నోరూరించే పెప్పర్ చికెన్ తయారీ విధానం ..

నాన్ వెజ్ ప్రియులకు చికెన్ మంచి ఫేవరెట్ డిష్. అందులో ఉన్న రకాలన్నీ చేసుకుని తినేయాలనిపిస్తుంది. కానీ చేసుకోవడం తక్కువ మందికే వచ్చు. అందుకే మేమిక్కడ పెప్పర చికెన్ తయారీ చెబుతున్నాం. చాలా సులువైన పద్ధతిలో ఎవరైనా కూడా పెప్పర్ చికెన్ చేసుకోవచ్చు.

కావాల్సిన పదార్ధాలు :

చికెన్ - అరకిలో (బోన్ లేదా బోన్ లెస్ అనేది మీ ఇష్టం), ఉల్లిపాయల తరుగు - ఒక టేబుల్ స్పూను, మిరియాల పొడి - ఒక టీస్పూను, మిరియాలు - ఒకటిన్నర టీ స్పూను పసుపు - పావు టీ స్పూను, నిమ్మరసం - ఒక టీస్పూను, ఉప్పు - తగినంత, అల్లం వెల్లుల్లి పేస్టు - ఒక టీస్పూను, వెల్లుల్లి పాయలు - రెండు రెబ్బలు, పచ్చి మిరపకాయలు - నాలుగు, కరివేపాకు - రెండు రెబ్బలు, గరం మసాలా - అర టీస్పూను,

తయారీ విధానం :

1. చికెన్ బోన్ తో లేదా బోన్ లెస్ ఎలాగైనా పెప్పర్ చికెన్ కు వాడొచ్చు.

2. ముందు చికెన్ ముక్కలు శుభ్రంగా కడిగి, వాటికి ఉప్పు, పసుపు, మిరియాలపొడి, నిమ్మరసం పట్టించి అరగంటపాటూ పక్కన పెట్టాలి.

3. ఈలోపు మిరియాలను మరీ పొడిలా కాకుండా రవ్వలా దంచి పక్కన పెట్టుకోవాలి.

4. ఇప్పుడు కళాయిలో నూనె వేసి వేడెక్కాకా ఉల్లిపాయ ముక్కలు, కరివేపాకు వేసి వేయించాలి.

5. అందులో అల్లం వెల్లుల్లి పేస్టు, పచ్చిమిర్చి ముక్కలు వేసి వేయించాలి.

6. తరువాత గరంమసాలా పొడి, దంచిన మిరియాలు వేసి బాగా కలపాలి.

7. ఆ మిశ్రమంగా బాగా వేగాక మారినేషన్ చేసిన చికెన్ ముక్కల్ని వేసి కలపాలి.

8. ఓ 20 నిమిషాల పాటూ బాగా ఉడికించాలి. నీళ్లన్నీ ఆవిరయ్యాక ఒక స్పూను నూనె వేసి చికెన్ ను వేయించాలి. అంతే పెప్పర్ చికెన్ సర్వ్ చేయడానికి సిద్ధంగా ఉంది.