నేడే సన్‌రైజర్స్ హైదరాబాద్ కు తాడో పేడో తేల్చేసే మ్యాచ్..

నేడు జరగబోయే మ్యాచ్ల్లో సన్‌రైజర్స్ హైదరాబాద్ కు తాడో పేడో తేలిపోనుంది. ఐపీఎల్ 2020లో చివరి లీగ్ మ్యాచ్ నేడు జరగనుంది. షార్జా వేదికగా ముంబై ఇండియన్స్‌తో జరిగే ఈ మ్యాచ్‌లో సన్‌రైజర్స్ హైదరాబాద్ గెలిస్తే ప్లేఆఫ్‌కు అర్హత సాధిస్తుంది. మెరుగైన నెట్ రన్ రేట్ ఉన్న ఆరెంజ్ ఆర్మీ పాయింట్ల పట్టికలో మూడో స్థానానికి చేరుకుంటుంది. ఒకవేళ ఓడితే మాత్రం సన్‌రైజర్స్ టోర్నీ నుంచి నిష్క్రమిస్తుంది. అప్పుడు కోల్‌కతా నైట్ రైడర్స్ నాలుగో స్థానానికి చేరుకుంటుంది. 13 మ్యాచ్‌ల్లో 9 విజయాలు సాధించిన ముంబై ఇండియన్స్ 18 పాయింట్లతో అగ్రస్థానంలో ఉంది. ఈ మ్యాచ్‌లో గెలిచినా, ఓడినా ముంబై పాయింట్ల పట్టికలో తొలిస్థానంలోనే ఉంటుంది. మిగతా జట్లన్నీ ఓడుతూ, గెలుస్తూ లీగ్ దశను ముగించగా ఒక్క ముంబై మాత్రమే తేలిగ్గా ప్లేఆఫ్‌కు అర్హత సాధించింది. గాయం కారణంగా రోహిత్ గత కొద్ది మ్యాచ్‌లకు దూరమైనా కీరన్ పోలార్డ్ జట్టును సమర్థవంతంగా ముందుకు నడిపిస్తున్నాడు. సన్‌రైజర్స్‌తో మ్యాచ్‌లోనూ రోహిత్ ఆడకపోవచ్చు. కానీ డికాక్, ఇషాన్ కిషన్, సూర్యకుమార్ యాదవ్, పోలార్డ్ బ్రదర్స్, కీరన్ పోలార్డ్‌లతో ఆ జట్టు బ్యాటింగ్ చాలా బలంగా ఉంది. బౌలింగ్‌లో బుమ్రా, బౌల్ట్ కీలక పాత్ర పోషిస్తున్నారు. ఈ సీజన్లో ఇప్పటి వరకూ వీరిద్దరూ కలిసి 43 వికెట్లు పడగొట్టారు. జట్టు మంచి పటిష్ట స్థితిలో వుంది.

ఇక ప్లే ఆఫ్ విషయానికి వస్తే గురువారం జరగబోయే మ్యాచ్‌లో ఢిల్లీపై ముంబై విజయం సాధిస్తే నేరుగా ఐపీఎల్ ఫైనల్‌కు చేరుకుంటుంది. ఆ జట్టు ఆలోచనలన్నీ తొలి ప్లేఆఫ్ మ్యాచ్ చుట్టే తిరిగే అవకాశం ఉంది. దీంతో ఈ మ్యాచ్‌లో కొందరు ఆటగాళ్లకి ముంబై విశ్రాంతినిచ్చినా ఆశ్చర్యపోనక్కర్లేదు. సన్‌రైజర్స్ విషయానికి వస్తే బ్యాటింగ్‌లో ఓపెనర్లు వార్నర్, సాహా కీలకం కానున్నారు. మనీష్ పాండే, విలియమ్సన్ సత్తా చాటాలని ఫ్యాన్స్ కోరుకుంటున్నారు. బౌలింగ్‌లో సందీప్ శర్మ, రషీద్ ఖాన్, నటరాజన్ ఆకట్టుకుంటున్నారు. విజయ్ శంకర్ లేని లోటును గత మ్యాచ్‌లో హోల్డర్ పూడ్చాడు. పంజాబ్ చేతిలో పేలవంగా ఓడిన సన్‌రైజర్స్ ఆ తర్వాత ఢిల్లీ, బెంగళూరు జట్లతో జరిగిన మ్యాచ్‌ల్లో అద్భుతమైన విజయాలు సాధించింది. ఈ మ్యాచ్‌లోనూ పూర్తి సామర్థ్యం మేర ఆడితే ముంబై మీద గెలవడం కష్టమేం కాబోదు. షార్జా పిచ్ మీద తేమ ప్రభావం ఉంటోంది. కాబట్టి టాస్ గెలిచిన జట్టు లక్ష్య చేధనకు మొగ్గు చూపవచ్చని తెలుస్తుంది. కోల్‌కతా నైట్ రైడర్స్ కంటే సన్‌రైజర్స్ హైదరాబాద్ మెరుగైన రన్ రేట్ కలిగివుండడం వల్ల హైదరాబాద్ గెలిస్తే కోల్‌కతా ను ప్లే ఆఫ్ నుండి గెంటేస్తుంది.