వీగన్ టర్మరిక్ జింజర్ ఫ్రాపే...ఇమ్యూనిటీ డ్రింక్....

ఇమ్యూనిటీ అంటే రోగనిరోధక శక్తి. ఈ శక్తి మనని ఇంఫెక్షన్స్ నించీ, జబ్బులనించీ కాపాడుతుంది. మనం పుట్టినప్పుడే కొంత ఇమ్యూనిటీతో పుడతాం. దీన్ని నాచురల్ ఇమ్యూనిటీ అంటారు. తరువాత మనం తీసుకునే ఆహారాన్ని బట్టి, మన జీవనశైలిని బట్టీ, మన పరిసరాలని బట్టి మనకి కొంత ఇమ్యూనిటీ పెరుగుతుంది. దీనిని ఎక్వైర్డ్ ఇమ్యూనిటీ అంటారు. అత్యవసర పరిస్థితుల్లో ఇంకొకరి నించి ట్రాన్స్ఫెర్ చేసే ఇమ్యూనిటీని పాసివ్ ఇమ్యూనిటీ అంటారు. ఇది ఆ అవసరానికే పనికొస్తుంది. నాల్గవది ఇమ్యునైజేషన్. అంటే వ్యాక్సిన్ల వంటి వాటి ద్వారా కొన్ని ప్రత్యేకమైన రోగాలను నిరోధించే శక్తి ని కలుగచేయడం.

ఇమ్యూనిటీని రకరకాల మార్గాల్లో పెంచుకోగలం. రోజుకి ఆరు నించీ ఎనిమిదిగంటల నిద్రా, రోజూ కనీసం ముప్ఫై నిమిషాల వ్యాయామం, ఒత్తిడి తాగించుకుని ప్రశాంతం గా ఉండడం, కావాలసినంత నీరు తాగడం తో పాటూ ఇమ్యూనిటీని పెంచే ఆహార పదార్ధాలు తీసుకోవడం ద్వారా ఇమ్యూనిటీ ని పెంచుకోగలుగుతాం. నిజానికి త్వరగా ఇమ్యూనిటీ పెరగాలంటే ఆహారమే ఏకైక మార్గం. పండ్లూ, పండ్ల రసాలూ, తాజా కూరగాయలూ, పాలూ, పాల పదార్ధాలూ సరైన పాళ్ళలో తీసుకుంటే ఇమ్యూనిటీ తొందరగా పెరుగుతుంది.

వాతావరణం మారిన ఈ సమయం లో రుచి గా ఉండే ఒక ఇమ్యూనిటీ బూస్టర్ ని ఇక్కడ పరిచయం చేస్తున్నాం. మీరు కూడా హాయిగా ఈ డ్రింక్ ప్రిపేర్ చేసుకుని తాగి హాపీ గా ఉండండి. మనందరికీ గోరువెచ్చని పాలలో ఒక్క చిటికెడు పసుపు వేసి రాత్రిపూట తాగడం తెలుసు. చిన్నపిల్లలకి ఇది బాగా హెల్ప్ చేస్తుందని వాళ్ళకి రెగ్యులర్ గా ఇస్తూ ఉంటాం. దీన్నే కొంచెం మారిస్తే పిల్లలూ, పెద్దలూ కూడా చాలా ఇష్టంగా తాగుతారు. ఇది తయారు చెసేప్పుడే కొంచెం ఎక్కువ తయారు చేసుకోండి. పిల్లలూ, పెద్దలూ కూడా మరి కాస్త కావాలని అడుగుతారు. పైగా ఇది వీగన్ కూడా. ఈ వీగన్ టర్మరిక్ జింజర్ ఫ్రాపే ని ఎలా తయారు చేసుకోవాలో చూద్దాం.

కావలసిన పదార్ధాలు:

బాదాం పప్పు - మూడు
నట్ మెగ్ పౌడర్- ఒక చిటికెడు
దాల్చిన చెక్క పొడి - ఒక చిటికెడు
మిరియాల పొడి - ఒక చిటికెడు
బెల్లం పొడి - ఒక టీ స్పూన్
ఆల్మండ్ మిల్క్ - ఒక కప్పు
పసుపు - ఒక టీ స్పూన్
అల్లం - ఒక టీ స్పూన్

తయారు చేసే పద్ధతి:

బాదాం పప్పులని సన్నని తరుగులా చేసి పక్కన ఉంచండి. మిగిలిన పదార్ధాలనీ బాగా బ్లెండ్ చేసిన తరువాత ఈ సన్నని బాదాం పప్పుల తురుముని కూడా అందులో కలిపి అస్వాదించండి. ఇది బనానా అవకాడో మ్యూస్ తో కలిపి తాగితే ఇంకా మంచిదని నిపుణులు చెబుతున్నారు.

ఈ ఫ్రాపే చాలా రుచిగా ఉంటుంది. ఇది తాగితే మీ టేస్ట్ బడ్స్ కి మంచి ఫీస్ట్ ఇచ్చినట్లే. ఇందులో కలిపిన పసుపు, మిరియాలు, దాల్చిన చెక్క వలన ఇమ్యూనిటీ పెరగడానికి సహకరిస్తుంది. పైగా ఇందులో బెల్లం కూడా కలిపాం కనక శరీరానికి ఐరన్ అందుతుంది. ఈ మాన్సూన్ టైం లో ఇంత కంటే ఇంకేం అక్కర్లేదు. బనానా అవకాడో మ్యూస్ కూడా కలిపి తీసుకున్నారనుకోండి, అందులో ఉన్న అరటి పండు, అవకాడో, నట్స్ వల్ల రుచి కి రుచీ, ఆరోగ్యానికి ఆరోగ్యం.