యాంటీ కరోనా టీ ..వరంగల్ యువకుడి విన్నూత్న ఆలోచన ..

కరోనా వైరస్ బారిన పడకుండా ఉండటం కోసం జనం రకరకాల ప్రయత్నాలు చేస్తున్నారు. కషాయాలు చేసుకొని తాగడం, ఉదయాన్నే గోరువెచ్చని నీటిలో నిమ్మరసం కలుపుకొని తాగడం లాంటి పనులు చేస్తున్నారు. కరోనా భయం కారణంగా ఇంతకు ముందులా బయట ఏదీ కొనుక్కొని తినడం లేదు. ఒకప్పుడు తేనీటి ప్రేమికులతో కిటకిటలాడిన టీ స్టాల్స్‌ది కూడా అదే పరిస్థితి.

కానీ కరోనా భయాన్ని కూడా ఓ టీ స్టాల్ తెలివిగా క్యాష్ చేసుకుంటోంది. ‘యాంటీ కరోనా’ టీ విక్రయిస్తోంది. సహజ సిద్ధంగా రోగనిరోధక శక్తిని పెంచే అల్లం, మిరియాలు, దాల్చిన చెక్క పొడి తదితరాలతో టీని అందిస్తోంది. ఈ పదార్థాల మిశ్రమం రోగ నిరోధక శక్తిని పెంచుతుందని టీ స్టాల్ యజమాని శివ తెలిపాడు.

కరోనాతో పోరాడేందుకు రోగనిరోధక శక్తిని పెంచుకోవడం ముఖ్యం. కాబట్టి ఈ రకమైన టీని తయారు చేసి అమ్ముతున్నామని శివ చెప్పాడు. కరోనా స్పెషల్ టీలో ఆయుర్వేద మిశ్రమాలు ఉన్నాయని.. ఇవి ఇమ్యూనిటీని పెంచుతాయని ప్రభాకర్ అనే కస్టమర్ తెలిపాడు. తాము రోజూ మూడుసార్లు ఈ టీ తాగుతామని చెప్పాడు.