ట్రంప్ నిర్ణయంపై న్యాయపోరాటానికి సిద్దమైన టిక్ టాక్
By: Sankar Sun, 20 Sept 2020 08:07 AM
భారత్ తరహాలోనే అమెరికా కూడా టిక్ టాక్, వీ చాట్ యాప్‌లను తమ దేశంలో నిషేధం విధించిన సంగతి తెలిసిందే. అయితే, తమపై నిషేధం విధించడంపై టిక్ టాక్ సహా దాని మాతృసంస్థ బైట్డ్యాన్స్ న్యాయపరమైన పోరుకు సిద్ధమయ్యాయి.
ఇందులో భాగంగా అధ్యక్షుడు డొనాల్డ్‌ ట్రంప్ తీసుకున్న నిర్ణయంపై వాషింగ్టన్‌లోని ఫెడరల్ కోర్టులో పిటిషన్ వేశాయి. శుక్రవారం రాత్రి ఈ పిటిషన్ వేసినట్లు అమెరికాకు చెందిన ఓ టీవీ ఛానెల్ రిపోర్టు చేసింది. నిబంధనలకు విరుద్ధంగా చైనాకు చెందిన యాప్‌పై నిషేధం విధించారని టిక్ టాక్ సహా బైట్డ్యాన్స్ తమ ఫిర్యాదులో పేర్కొన్నాయి. నిషేధం ఎత్తివేసేలా ట్రంప్ ప్రభుత్వాన్ని ఆదేశించాలని కోరాయి.
ట్రంప్ తన రాజకీయ ప్రయోజనాల కోసం అధికార పరిధులు దాటి టిక్‌టాక్‌‌ను బ్యాన్ చేశారని సదరు సంస్థలు ఆరోపించాయి. భద్రత, గోప్యత విషయంలో పౌరుల ప్రయోజనాలను కాపాడుతున్నామన్న తమ ఆధారాలను ఏమాత్రం పరిగణనలోకి తీసుకోలేదని గుర్తు చేశాయి. సెప్టెంబరు 20 నుంచి టిక్ టాక్, వీ చాట్ రెండు యాప్‌ల డౌన్‌లోడ్‌లు అమెరికాలో పూర్తిగా నిలిచిపోనున్నాయి.
ట్రంప్‌పై టిక్‌టాక్‌ కోర్టుకు వెళ్లడం ఇది రెండోసారి. తాజా చర్యతో అమెరికా, చైనా మధ్య నెలకొన్న సాంకేతిక పోరు మరింత తీవ్ర రూపం దాల్చినట్లైంది. దేశ భద్రతను దృష్టిలో ఉంచుకొనే సదరు యాప్‌లను నిషేధించినట్లు ట్రంప్ వెల్లడించిన సంగతి తెలిసిందే.
