స్థలం విషయంలో జగపతి బాబు సోదరుడికి బెదిరింపు ఫోన్ ‌కాల్స్

ప్రముఖ టాలీవుడ్ నటుడు జగపతి బాబు సోదరుడికి స్థలం విషయంలో బెదిరింపు ఫోన్ ‌కాల్స్ వచ్చాయి. సినీ నటుడు జగపతి బాబు సోదరుడు యుగేంద్ర కుమార్‌కు బెదిరింపు కాల్స్‌ వచ్చాయి. ఒక స్థలం విషయంలో తనను చంపేస్తానని బెదిరిస్తూ ఫోన్ కాల్స్ వచ్చాయని బంజారాహిల్స్ పోలీసులకు యుగేంద్ర ఫిర్యాదు చేశారు.

మాదాపూర్‌లోని గుట్టల బేగంపేటలో ఉన్న స్థలం విషయంలో శ్రీనివాస్ అనే వ్యక్తి నుంచి బెదిరింపు కాల్స్ వచ్చాయని యుగేంద్ర ఫిర్యాదులో పేర్కొన్నారు. మొత్తం 25 ఫోన్ కాల్స్ వచ్చాయన్నారు. తనతో పాటు తన కుమారుడిని కూడా చంపేస్తామని బెదిరించినట్టు పోలీసులకు చెప్పారు.

ఈ బెదిరింపు ఫోన్ ‌కాల్స్ వెనుక బంజారాహిల్స్ ఎమ్మెల్యే కాలనీకి చెందిన రాజిరెడ్డి ఉన్నట్టు యుగేంద్ర అనుమానం వ్యక్తం చేశారు. కేసు నమోదు చేసుకున్న పోలీసులు దర్యాప్తు ప్రారంభించారు. ప్రస్తుతం యుగేంద్ర కుటుంబం ఫిలింనగర్‌లో నివాసం ఉంటోంది. దీనివల్ల అయన తీవ్ర మనస్తాపానికి గురైనట్లు తెలుస్తుంది.