రష్యాలో జరిగే కవ్కాజ్-2020 లో పాల్గొనకూడదని భారత ప్రభుత్వం నిర్ణయం

మధ్య ఆసియా సభ్య దేశాలు పాల్గొనే కవ్కాజ్-2020 లో పాల్గొనకూడదని భారత ప్రభుత్వం నిర్ణయించింది. రష్యాలో జరిగే బహుళజాతి సైనిక వ్యాయామం కవ్కాజ్-2020 లో భారత సైన్యం పాల్గొనడంలేదు. కవ్కాజ్ కు తమ బృందాన్ని పంపేది లేదని భారత రక్షణ మంత్రిత్వ శాఖ స్పష్టంచేసింది. కవ్కాజ్-2020 ని రష్యాలో నిర్వహిస్తున్నారు. ఈ బహుళజాతి సైనిక వ్యాయామంలో రష్యాతోపాటు చైనా, పాకిస్తాన్ దళాలు పాల్గొంటున్నాయి.

మన దేశానికీ ఆయుధాల రంగంలో రష్యా ఎంతో సహకారం అందిస్తున్న విషయం తెలిసిందే. రష్యా, భారతదేశం ప్రత్యేకమైన వ్యూహాత్మక భాగస్వాములు. రష్యా ఆహ్వానం మేరకు భారత్ అనేక అంతర్జాతీయ కార్యక్రమాల్లో పాల్గొంటున్నది. అయినప్పటికీ కరోనా వల్ల వ్యాయామంలో ఇబ్బందులు ఉన్నందున ఈ ఏడాది నిర్వహిస్తున్న కవ్కాజ్-2020 లో పాల్గొనకూడదని భారత ప్రభుత్వం నిర్ణయించింది అని రక్షణ మంత్రిత్వ శాఖ ప్రతినిధి ఒకరు తెలిపారు.

ఈ సంవత్సరం జూన్ 15 న తూర్పు లడఖ్ పరిధిలోని గల్వాన్ లోయలో భారత్-చైనా ఘర్షణలో 20 మంది భారతీయ జవాన్లు ప్రాణాలు కోల్పోగా అనేక మంది చైనా సైనికులు మరణించారు మరియు గాయపడ్డారు. ఆ తరువాత ఇరు దేశాల మధ్య నెలకొన్న పరిస్థితుల కారణంగా వాస్తవాధీన రేఖ వెంబడి సైన్యాన్ని మోహరించిన విషయం తెలిసిందే. వచ్చేనెల రష్యాలో సెప్టెంబర్ 4-6 తేదీలలో షాంఘై సహకార సంస్థ రక్షణ మంత్రుల సమావేశానికి రక్షణ మంత్రి రష్యాను సందర్శించనున్నారని, అయితే భారత ప్రతినిధి తన చైనా ప్రత్యర్థితో ఎలాంటి చర్చలు జరిపే అవకాశం లేదని ఆయా వర్గాలు తెలిపాయి.

సెప్టెంబరులో కవ్కాజ్ -2020 కోసం దక్షిణ రష్యాకు సుమారు 200 మంది సిబ్బందితో ట్రై-సర్వీసెస్ వ్యాయామంలో పాల్గొనడానికి రష్యా భారతదేశాన్ని ఆహ్వానించింది. దక్షిణ రష్యాలోని ఆస్ట్రాఖాన్ ప్రావిన్స్‌లో ఈ వ్యాయామం జరుగనున్నది. ఈ మిలటరీ ఎక్సర్సైజ్లో షాంఘై సహకార సంస్థ, మధ్య ఆసియా దేశాల సభ్య దేశాలు పాల్గొంటాయి. ప్రపంచ వ్యాప్తంగా కరోనా అధిక సంఖ్యలో వ్యాపించడం వల్ల భారత దేశం పాల్గొనడంలేదు.