పెళ్ళై కొద్దీ సేపటికే వరుడిని కాదని ప్రియుడితో వెళ్లిన వధువు

పెళ్ళై కొద్దీ సేపటికే వరుడిని వదలి ప్రియుడితో వెళ్లిన వధువు సంఘటన ఒకటి కరీంనగర్ జిల్లాలో చోటుచేసుకుంది. మూడుముళ్లతో ఒక్కటై ఏడడుగులు నడిచి కొద్దిసేపైనా గడవలేదు వరుడికి ఊహించని షాకిచ్చింది వధువు. తన ప్రియురాలిని నువ్వెలా పెళ్లి చేసుకుంటావంటూ ఆమె ప్రియుడు వచ్చి గొడవ చేయడంతో కట్టుకున్న భర్తని కాదని వెళ్లి పంచాయితీ పోలీస్ స్టేషన్‌కి చేరింది. తనకు ప్రియుడే కావాలంటూ ఆమె లిఖితపూర్వకంగా రాసివ్వడంతో చేసేదిలేక వరుడు ఒంటరిగా ఇంటిముఖం పట్టాడు. ప్రియుడు పోలీస్ స్టేషన్‌లో వధువు స్వధార్‌ హోంకు తరలించారు. ఈ షాకింగ్ ఘటన కరీంనగర్ జిల్లాలో చోటుచేసుకుంది.

ఇంట్లో పెద్దవాలందరు కలసి హుజురాబాద్‌లోని మామిడ్లవాడ కు చెందిన దివ్యకి మంచిర్యాల జిల్లా రామకృష్ణాపూర్‌కు చెందిన ప్రవీణ్ కుమార్‌తో పెళ్లి సంబంధం నిశ్చయించారు. బంధువుల సమక్షంలో వైభవంగా వివాహం జరిగింది. బాజాభజంత్రీల నడుమ అప్పగింతలు జరుగుతున్న సమయంలో అనూహ్యంగా ఊహించని షాకిచ్చాడు వధువు ప్రియుడు. హుజురాబాద్‌కు చెందిన ప్రియుడు వంశీ మద్యం మత్తులో అక్కడికి చేరుకొని దివ్య ను తాను ప్రేమించానని నువ్వెలా పెళ్లి చేసుకున్నావంటూ గొడవ సృష్టించాడు. నవ దంపతులు పెళ్లికూతురి ఇంటి నుంచి ఊరేగింపుగా బయలుదేరుతుండగా కారును అడ్డుకోవడంతో పెళ్లికొడుకు కంగుతిన్నాడు.

ఈ సంఘటన జరగడంతో గందరగోళం నడుమ పంచాయితీ హుజూరాబాద్ పోలీస్ స్టేషన్‌కి చేరింది. మద్యం మత్తులో వంశీ తాను వివాహం చేసుకున్న అమ్మాయిని ప్రేమించానంటూ గందరగోళం చేయడంతో పాటు తనపై దాడి చేసేందుకు ప్రయత్నించాడని వరుడు పోలీసులకు ఫిర్యాదు చేశాడు. దళితుడినైన తనకు అతని నుంచి ప్రాణహాని ఉందని చెప్పడంతో ప్రియుడు వంశీపై ఎస్సీ, ఎస్టీ అట్రాసిటీ కేసుతో పాటు న్యూసెన్స్ కేసు నమోదు చేశారు. పోలీసు విచారణలో పెళ్లికూతురు వరుడికి షాకిచ్చింది. తాను వంశీని ప్రేమిస్తున్నానని అతనితోనే ఉంటానని చెప్పడంతో పెళ్లికొడుకు కంగుతిన్నాడు. ఈ మేరకు వధువు లిఖితపూర్వకంగా రాసిచ్చినట్లు తెలుస్తోంది. పెళ్లి కూతురు అడ్డం తిరగడంతో ఇక చేసేది లేక వరుడు ఒంటరిగా చేతితో పూలదండతో దిగాలుగా ఇంటిముఖం పట్టాడు. ప్రియుడు వంశీని పోలీసులు అదుపులోకి తీసుకోగా వధువును స్వధార్‌ హోంకి తరలించారు. పెళ్ళికి వచ్చిన వారంతా ఇలాంటి దురదృష్ట కర సంఘటన చూసి వాపోయారు.