చెన్నై విజయంపై సురేశ్ రైనా,హర్భజన్ సింగ్ ట్వీట్..!
By: Anji Mon, 05 Oct 2020 10:18 AM
కింగ్స్ ఎలెవన్ పంజాబ్‌పై చెన్నై సూపర్ కింగ్స్ ఘన విజయం పట్ల క్రికెటర్ సురేశ్ రైనా స్పందించాడు. చెన్నై సూపర్ కింగ్స్ గొప్ప విజయం సాధించినందుకు ఆనందం వ్యక్తం చేశాడు. చెన్నై క్రికెటర్లు అద్భుతంగా ఆడారని కొనియాడారు.
తన ఫ్రాంచైజీకి హృదయపూర్వకంగా అభినందనలు తెలిపాడు. బ్యాటింగ్‌లోనూ, బౌలింగ్‌లోనూ చెన్నై సూపర్ కింగ్స్ అద్భుతంగా రాణించిందని కొనియాడాడు. చెన్నై లక్ష్య చేధనకు దిగిన తర్వాత.. వాట్సన్, డుప్లెసిస్ అద్భుతంగా ఆడుతున్నారంటూ సురేశ్ రైనా ట్వీట్ చేశాడు.
చెన్నై సూపర్ కింగ్స్ విజయం పట్ల హర్భజన్ సింగ్ కూడా స్పందించాడు. ‘ఛాంపియన్స్ మళ్లీ పట్టాలెక్కారు. చెన్నై గొప్ప విజయం సాధించింది’ అని హర్భజన్ సింగ్ ట్వీట్ చేశాడు. శార్దూల్ థాకూర్ వరుస బంతుల్లో రాహుల్, పూరన్ వికెట్లను తీయడం మ్యాచ్‌ను మార్చేసిందని అంతకు ముందు భజ్జీ ట్వీట్ చేశాడు.
ఐపీఎల్ 13వ సీజన్ ఆడటం కోసం సురేశ్ రైనా యూఏఈ వెళ్లినప్పటికీ.. వ్యక్తిగత కారణాలతో తిరిగి ఇండియాకొచ్చాడు. హర్భజన్ ఈ సీజన్‌కు దూరం అవుతున్నట్లు ప్రకటించాడు. దీంతో ఇద్దరి పేర్లను ఆటగాళ్ల జాబితా నుంచి తొలగించిన చెన్నై సూపర్ కింగ్స్.. వారిద్దరి కాంట్రాక్టులను సైతం రద్దు చేసే ప్రక్రియను ప్రారంభించినట్లు సమాచారం.
