జేమ్స్ బాండ్ తరహాలో స్టెప్పులు.వేసిన ట్రంప్...వీడియో వైరల్...

అమెరికా అధ్యక్ష ఎన్నికల వెళ డొనాల్డ్ ట్రంప్ దూకుడుపెంచారు. వరుస ర్యాలీలతో, తనదైన వ్యాఖ్యాలతో తన మద్దతుదారుల్లో ఉత్సాహం నింపిన ఆయన క్యాంపెయిన్ ముగియడానికి కొన్ని గంటల ముందు ట్విటర్ ఖాతా ద్వారా ఆసక్తికర వీడియోనుషేర్ చేశారు. ఆ వీడియోలో హాలీవుడ్ పాటకు కాళ్లు కదుపుతూ కనిపించారు. డ్యాన్స్ చేస్తూ తన మద్దతుదారుల్లో మరింత ఉత్సాహం నింపారు. పోస్టు చేసిన క్షణాల వ్యవధిలోనే ఆ వీడియో తెగ వైరల్ అవుతోంది. VOTE! VOTE! VOTE! అనే క్యాప్షన్‌తో ట్రంప్ షేర్ చేసిన వీడియో ఆసక్తికరంగా ఉంది. ఎన్నికల ప్రచారంలో భాగంగా తాను వివిధ సందర్భాల్లో ర్యాలీలో పాల్గొన్న సందర్భాలకు సంబంధించిన దృశ్యాలతో ఆ వీడియోను రూపొందించారు. జేమ్స్ బాండ్ తరహాలో ట్రంప్ వేసిన స్టెప్పులు తన అభిమానులను ఉర్రూతలూగిస్తున్నాయి.

మొత్తానికి సర్వేల్లో జో బిడెన్ ముందంజలో ఉన్నారనే వార్తలు వస్తున్నవేళ డొనాల్డ్ ట్రంప్ సరికొత్త అస్త్రం వదిలారు. చివరి గంటల్లో తన మద్దతుదారుల్లో మరింత ఉత్సాహం నింపే ప్రయత్నం చేశారు. ‘మరో నాలుగేళ్ల కోసం ఇవాళే ఓటేయండి’ అని ఓటర్లను కోరారు. మరొక ఆసక్తికర అంశమేమిటంటే ఆ వీడియోలో ఓట్, ఓట్, ఓట్ అని చెప్పారే తప్ప తనకు గానీ, తన పార్టీ అభ్యర్థులకు గానీ ఓటేయాలని ఎక్కడా కోరకపోవడం గమనార్హం. ఎన్నికల నిబంధల ప్రకారం వీడియోపై నిషేధం పడకుండా, తగిన జాగ్రత్తలతో తాను చెప్పాలనుకున్న విషయం అలా చేరవేశారన్నమాట. మరోవైపు ప్రపంచమంతా ఆసక్తిగా ఎదురుచూస్తున్న అమెరికా అధ్యక్ష ఎన్నికల పోలింగ్ మొదలైంది. యూఎస్‌లోని రాష్ట్రాలన్నీ స్థానిక కాలమానం ప్రకారం నవంబర్ 3 ఉదయం నుంచే పోలింగ్‌ను ప్రారంభించారు. అయితే సంప్రదాయం ప్రకారం ఈశాన్య రాష్ట్రమైన న్యూ హాంప్‌షైర్‌లో మాత్రం అర్ధరాత్రి 2 గంటల నుంచే పోలింగ్ మొదలైంది. ఇక్కడ ఓటింగ్‌తోనే అమెరికా ఎన్నికల పోలింగ్ ప్రారంభమవుతుంది.