సాఫ్ట్‌వేర్‌ శారదకు సాయం చేసేందుకు ముందుకొచ్చిన సోనూ సూద్‌

ఇబ్బందుల్లో ఉన్నవారికి సాయం అందించి రియల్‌ హీరో అనిపించుకుంటున్న నటుడు సోనూ సూద్‌ మరోసారి పెద్ద మనసు చాటుకున్నారు. సాఫ్ట్‌వేర్‌ శారదకు సాయం చేసేందుకు ముందుకొచ్చారు. సాక్షి టీవీ కథనానికి స్పందించిన సోనూ సూద్ సాఫ్ట్‌వేర్ ఆమె ఫోన్ నంబర్ అడిగి తెలుసుకున్నారు. శారదకు వ్యక్తిగతంగా సాయం చేస్తానని హామీనిచ్చారు.

కరోనా లాక్‌డౌన్‌ కారణంగా ఉద్యోగం కోల్పోయిన యువ సాఫ్ట్‌వేర్‌ శారద తల్లిదండ్రులకు సాయంగా కూరగాయల వ్యాపారం చేస్తున్న సంగతి తెలిసిందే. ఈక్రమంలో యువ సాఫ్ట్‌వేర్‌ జీవిత గమనంపై ‘సాక్షి’ కథనం ప్రచురించడంతో వైరల్‌ అయింది.

జీవితంలో ఆటుపోట్లు సహజమని, ఉద్యోగం కోల్పోయినంత మాత్రాన దిగులుపడొద్దని శారద యువతకు సందేశమిచ్చారు. బతికేందుకు ఎన్నో మార్గాలు ఉన్నాయని, సమస్యలకు ఎదురొడ్డి పోరాడాలని చెప్పారు. ఇక శారద స్ఫూర్తిదాయకమైన కథనంపై వరంగల్‌ ఎంపీ పసునూరి దయాకర్‌, తెలంగాణ మంత్రి ఎర్రబెల్లి దయాకర్‌రావు, వైఎస్సార్‌సీపీ విద్యార్థి విభాగం, ఉపరాష్ట్రపతి కార్యాలయం, తెలంగాణ బీజేపీ నాయకులు స్పందించారు.

ప్రభుత్వ పరంగా శారద కుంటుంబాన్ని ఆదుకుంటామని వరంగల్‌ ఎంపీ దయాకర్‌, మంత్రి ఎర్రబెల్లి దయాకర్‌రావు ఇప్పటికే వెల్లడించారు. ఇదిలాఉండగా కటిక దారిద్య్రంలో ఉన్న చిత్తూరు జిల్లా మదనపల్లెకు చెందిన ఓ రైతుకు ఏకంగా ట్రాక్టర్‌నే అందించారు సోనూ సూద్‌.