అదిరిపోయే ఫీచర్లతో మరో మూడు ఫోన్లను ఆవిష్కరించిన "రియల్ మీ"

ముంబై: టెక్ దిగ్గజ సంస్థ "రియల్ మీ" సూపర్ ఫీచర్లతో మూడు స్మార్ట్ ఫోన్లు ఆవిష్కరించింది. సెప్టెంబర్ నెలలో లాంచ్ అయిన రియల్ మీ క్యూ తర్వాత వెర్షన్‌గా రియల్ మీ క్యూ2, రియల్ క్యూ2 ప్రో, రియల్ మీ క్యూ2ఐ స్మార్ట్ ఫోన్లు చైనాలో లాంచ్ అయ్యాయి. ఈ మూడు ఫోన్లలో 5జీ సపోర్ట్, పెద్ద బ్యాటరీలు, మీడియాటెక్ ప్రాసెసర్లను అందించారు. వీటిలో రియల్ మీ క్యూ, రియల్ మీ క్యూ2 ప్రోల్లో రెండు ర్యామ్, స్టోరేజ్ వేరియంట్లు అందుబాటులో ఉండగా, రియల్ మీ క్యూ2ఐలో ఒక్క వేరియంట్ మాత్రమే అందుబాటులో ఉంది. ఈ మూడు ఫోన్లూ రెండు కలర్ ఆప్షన్లలో అందుబాటులో ఉన్నాయి. రియల్ మీ క్యూ2, క్యూ2 ప్రోల డిజైన్ దాదాపుగా ఒకే విధంగా ఉంది. రియల్ మీ క్యూ2ఐ డిజైన్ కాస్త వేరుగా ఉంది.

రియల్ మీ క్యూ ధర:

ఇందులో రెండు వేరియంట్లు ఉన్నాయి. వీటిలో 4 జీబీ ర్యామ్ + 128 జీబీ స్టోరేజ్ వేరియంట్ ధర 1,299 యువాన్లుగా(సుమారు రూ.14,200) నిర్ణయించారు.

6 జీబీ ర్యామ్ + 128 జీబీ స్టోరేజ్ వేరియంట్ ధర 1,399 యువాన్లుగా(సుమారు రూ.15,200) ఉంది. బ్లూ, సిల్వర్ రంగుల్లో ఈ ఫోన్ అందుబాటులో ఉంది.

రియల్ మీ క్యూ2 ప్రో ధర: ఇందులో కూడా రెండు వేరియంట్లే అందుబాటులో ఉన్నాయి. వీటిలో 8 జీబీ ర్యామ్ + 128 జీబీ స్టోరేజ్ వేరియంట్ ధర 1,799 యువాన్లుగా(సుమారు రూ.19,600) నిర్ణయించారు.

8 జీబీ ర్యామ్ + 256 జీబీ స్టోరేజ్ వేరియంట్ ధర 1,999 యువాన్లుగా(సుమారు రూ.21,800) ఉంది. గ్రే, గ్రేడియంట్ రంగుల్లో ఈ ఫోన్ అందుబాటులో ఉంది. ఈ రెండు ఫోన్లకు సంబంధించిన సేల్ అక్టోబర్ 19 నుంచి ప్రారంభం కానుంది.

రియల్ మీ క్యూ2ఐ ధర:

ఇందులో ఒక్క వేరియంట్ మాత్రమే అందుబాటులో ఉంది. 4 జీబీ ర్యామ్ + 128 జీబీ స్టోరేజ్‌తో వచ్చిన ఈ వేరియంట్ ధరను 1,199 యువాన్లుగా(సుమారు రూ.13,000) నిర్ణయించారు.

దీనికి సంబంధించిన ప్రీ-ఆర్డర్లు అక్టోబర్ 19వ తేదీ నుంచి ప్రారంభం కానున్నాయి. రియల్ మీ క్యూ2 స్పెసిఫికేషన్లు: ఇందులో 6.5 అంగుళాల ఫుల్ హెచ్ డీ+ డిస్ ప్లేను అందించారు.

దీని స్క్రీన్ రిఫ్రెష్ రేట్ 120 హెర్ట్జ్ గానూ, స్క్రీన్ టు బాడీ రేషియో 90.7 శాతంగానూ ఉంది. అక్టాకోర్ మీడియాటెక్ డైమెన్సిటీ 800యూ ప్రాసెసర్ పై ఈ ఫోన్ పనిచేయనుంది.

ఇందులో వెనకవైపు మూడు కెమెరాల సెటప్ ను అందించారు. వీటిలో ప్రధాన కెమెరాగా 48 మెగా పిక్సెల్ సామర్థ్యమున్న సెన్సార్ ను అందించారు.

దీంతో పాటు 8 మెగా పిక్సెల్ అల్ట్రా వైడ్ యాంగిల్ లెన్స్, 2 మెగా పిక్సెల్ మాక్రో సెన్సార్ లను కూడా ఇందులో అందించారు.

ఫీచర్లు:

ముందువైపు సెల్ఫీల కోసం 16 మెగా పిక్సెల్ కెమెరాను అందించారు. 6 జీబీ వరకు ర్యామ్, 128 జీబీ వరకు స్టోరేజ్ ఇందులో అందుబాటులో ఉన్నాయి. మైక్రో ఎస్‌డీ కార్డు ద్వారా స్టోరేజ్‌ను పెంచుకోవచ్చు. ఇందులో 5000 ఎంఏహెచ్ బ్యాటరీని శాంసంగ్ అందించింది. 30W ఫాస్ట్ చార్జింగ్ ఫీచర్ కూడా ఇందులో ఉంది.

ఆండ్రాయిడ్ 10 ఆధారిత రియల్‌మీయూఐ 2.0 ఆపరేటింగ్ సిస్టంపై ఈ ఫోన్ పనిచేయనుంది. 5జీ, 4జీ వోల్టే, వైఫై, యూఎస్ బీ టైప్-సీ, బ్లూటూత్, జీపీఎస్, గ్లోనాస్, 3.5 ఎంఎం ఆడియో జాక్ వంటి కనెక్టివిటీ ఫీచర్లు ఈ స్మార్ట్ ఫోన్‌లో ఉన్నాయి.

జియో మాగ్నటిక్ సెన్సార్, యాంబియంట్ లైట్ సెన్సార్, ప్రాక్సిమిటీ సెన్సార్, గైరో సెన్సార్ కూడా ఇందులో ఉన్నాయి. దీని మందం 0.91 సెంటీమీటర్లుగానూ, బరువు 194 గ్రాములుగానూ ఉంది. రియల్ మీ క్యూ2 ప్రో స్పెసిఫికేషన్లు: దీని స్పెసిఫికేషన్లు కూడా దాదాపు రియల్ మీ క్యూ2 తరహాలోనే ఉన్నాయి.

కాకపోతే ఇందులో కొన్ని మార్పులు ఉన్నాయి. 6.4 అంగుళాల ఫుల్ హెచ్‌డీ+ అమోఎల్ఈడీ డిస్ ప్లేను ఇందులో అందించారు. స్క్రీన్ రిఫ్రెష్ రేట్ 180 హెర్ట్జ్ గా ఉంది. స్క్రీన్ టు బాడీ రేషియో 90.8 శాతం ఉంది. అక్టాకోర్ మీడియాటెక్ డైమెన్సిటీ 800యూ ప్రాసెసర్ పై ఈ ఫోన్ పనిచేయనుంది.

కెమెరా ఫీచర్లు కూడా రెండిట్లోనూ ఒకేలా ఉన్నాయి. ఇందులో 8 జీబీ ర్యామ్, 256 జీబీ వరకు స్టోరేజ్ అందించారు. 5జీ, వైఫై, జీపీఎస్, 4జీ ఎల్టీఈ, గ్లోనాస్, యూఎస్‌బీ టైప్-సీ పోర్టు కూడా ఇందులో ఉన్నాయి.

4300 ఎంఏహెచ్ బ్యాటరీ, 65W ఫాస్ట్ చార్జింగ్ ఇందులో ఉన్నాయి. దీని మందం 0.81 సెంటీమీటర్లుగానూ, బరువు 175 గ్రాములుగానూ ఉంది. రియల్ మీ క్యూ2ఐ స్పెసిఫికేషన్లు: ఇందులో 6.5 అంగుళాల డిస్ ప్లేను అందించారు. దీని స్క్రీన్ టు బాడీ రేషియో 88.7 శాతంగానూ, యాస్పెక్ట్ రేషియో 20:9గానూ ఉంది.

మీడియాటెక్ డైమెన్సిటీ 720 ప్రాసెసర్‌పై ఈ ఫోన్లు పనిచేయనున్నాయి. 4 జీబీ ర్యామ్, 128 జీబీ స్టోరేజ్‌ను ఇందులో అందించారు. ఇందులో వెనకవైపు మూడు కెమెరాలు ఉన్నాయి. వీటిలో ప్రధాన కెమెరా సామర్థ్యం 13 మెగా పిక్సెల్ కాగా, మరో మాక్రో లెన్స్, డెప్త్ సెన్సార్ ఉన్నాయి. సెల్ఫీ కెమెరా సామర్థ్యం 8 మెగా పిక్సెల్ గా ఉంది. దీని బ్యాటరీ సామర్థ్యం 5000 ఎంఏహెచ్ గా ఉంది. 18W ఫాస్ట్ చార్జింగ్‌ను ఇది సపోర్ట్ చేయనుంది. ఇందులో వెనకవైపు ఫింగర్ ప్రింట్ స్కానర్‌ను కూడా అందించారు.