ఈ నేల 25 న రైతులతో భేటీ కానున్న పీఎం మోడీ...!

కేంద్రం తీసుకొచ్చిన కొత్త వ్యవసాయ చట్టాలకు వ్యతిరేకంగా రైతులు చేపట్టిన ఆందోళనలు 25వ రోజు కొనసాగుతున్నాయి. ఆందోళన చేపట్టి నాటి నుంచి ఇప్పటి వరకు 33 మంది రైతులు ప్రాణాలు కోల్పోయారు.

రోజు రోజుకూ రైతుల ఆందోళనలు ఉద్ధృతమవుతున్నాయి. ఈ నేపథ్యంలో వ్యవసాయ చట్టాలపై రైతులు, ప్రజలకు ఉన్న అపోహలను తొలగించడానికి బీజేపీ సర్కారు చర్యలను ముమ్మరం చేసింది. ఇందులో భాగంగా అవగాహన కార్యక్రమాలను ప్రారంభించింది.

మాజీ ప్రధాని వాజ్‌పేయీ జయంతిని పురస్కరించుకుని డిసెంబర్‌ 25న ప్రధాని నరేంద్ర మోదీ రైతులతో ముచ్చటించనున్నారు.

ఉత్తరప్రదేశ్‌లోని 2,500లకు పైగా ప్రాంతాల్లో కిసాన్‌ సంవాదక్‌ కార్యక్రమాలను నిర్వహించనున్నట్లు బీజేపీ వర్గాలు పేర్కొన్నాయి.

రైతులతో ప్రధాని భేటీ నేపథ్యంలో యూపీ బీజేపీ అధ్యక్షుడు స్వతంత్ర దేవ్‌ సింగ్‌, పార్టీ నేత రాధామోహన్‌ సింగ్‌లు కార్యకర్తలతో వర్చువల్‌గా ఆదివారం సమావేశమయ్యారు.

పేదలు, రైతుల సంక్షేమం కోసం కేంద్రం కృషి చేస్తోందని, గత ప్రభుత్వాలు సంస్కరణలు చేపట్టి ఉంటే ఇప్పటికే రైతుల పరిస్థితి మెరుగ్గా ఉండేదని వివరించారు. వ్యవసాయ చట్టాలపై ప్రతిపక్షాలు అసత్య ప్రచారం చేస్తున్నాయని ఆరోపించారు.

ఢిల్లీ సరిహద్దుల్లో చేపట్టిన నిరసనలను రైతులు కొనసాగిస్తున్నారు. ఉష్ణోగ్రతలు 3 డిగ్రీలకు పడిపోయినా.. ఎముకలు కొరికే చలిని సైతం లెక్కచేయడంలేదు. ఇదిలా ఉండగా.. ప్రస్తుత చట్టాలతో ఎటువంటి నష్టం జరగదని, రైతుల మేలు కోసమే అమలు చేశామని కేంద్రం సమర్ధించుకుంటోంది.

ఈ నేపథ్యంలోనే రైతులు, ప్రభుత్వానికి మధ్య పలుమార్లు చర్చలు జరిగినప్పటికీ సఫలం కాలేదు. కొత్త చట్టాలను పూర్తిగా రద్దు చేయాల్సిందేని రైతులు డిమాండ్‌ చేస్తున్నారు.

ఆందోళనలు ప్రారంభమైన తర్వాత పలు కారణాలతో 33 మంది రైతులు మృతిచెందారు. నేడు ఆ అమరవీరులకు రైతు సంఘాలు శ్రద్ధాంజలి ఘటించాయి. సింఘు, టిక్రీ, ఘాజీపూర్‌ వద్ద రైతు సంఘాలు సంతాపం వ్యక్తం చేశాయి.

ఈ సందర్భంగా దేశవ్యాప్తంగా లక్షకు పైగా గ్రామాల్లో సంతాప సభలు, మానవహారాలకు పిలుపునిచ్చాయి. తమ డిమాండ్లు నెరవేరేవరకు పోరాటం ఆగదని స్పష్టం చేశాయి. అంతేకాదు, తమ పోరాటం వెనుక ఏ రాజకీయ పార్టీ ప్రమేయం లేదని తెలిపాయి.

ప్రతిపక్షాలు రైతులను తప్పుదోవ పట్టిస్తున్నాయని బీజేపీ ఆరోపణలు గుప్పించిన నేపథ్యంలో వారు స్పందించారు.