అరేబియా సముద్రంలో ఆవర్తన ప్రభావం .... తెలుగు రాష్ట్రాలకు వర్ష సూచనలు

అరేబియా సముద్రంలో కొనసాగుతున్న ఉపరితల ఆవర్తం ప్రభావంతో రెండు తెలుగు రాష్ట్రాల్లో వానలు పడనున్నట్లు వాతావరణశాఖ ప్రకటించింది. తెలంగాణలో గురు, శుక్రవారాల్లో పలుచోట్ల భారీ వర్షాలు కురవనున్నాయని తెలిపింది. తెలంగాణలో జూన్‌ మాసంలోలో సాధారణంకంటే అధికంగా వర్షాలు కురిశాయని వివరించింది. ఈ నెలలోనూ అధికంగానే వానలు పడతాయని వాతావరణ శాఖ వెల్లడించింది. ఏపిలోనూ వచ్చే రెండు రోజుల్లో అక్కడక్కడ భారీ వర్షాలు కురవనున్నట్లు అంచనా వేసింది. ఇటు కోస్తా, ఉత్తరాంధ్రలో కొన్నిచోట్ల మోస్తరు నుంచి భారీ వర్షాలు పడనున్నట్లు వాతావరణ శాఖ అధికారులు చెప్పారు.

మరోవైపు, నైరుతి రుతుపవనాల ప్రభావంతో ఏపీలో మూడు రోజుల పాటు వర్షాలు కురుస్తాయని అమరావతి వాతావరణ కేంద్రం తెలిపింది. గురు, శుక్ర, శనివారాల్లో ఉరుములు, మెరుపులతో, ఉత్తర కోస్తా ఆంధ్రాలో తేలికపాటి నుంచి మోస్తరు వర్షాలు కురిసే అవకాశం ఉందని వెల్లడించింది. అక్కడక్కడ భారీ వర్షాలు కూడా కురుస్తాయని అంచనా వేశారు.

మరోవైపు దేశ ఆర్థిక రాజధాని ముంబైలో రానున్న రెండు రోజుల్లో భారీ వర్షాలు పడే అవకాశం ఉందని భారత వాతావరణ శాఖ(ఐఎండీ) తెలిపింది. ముంబైతో పాటు కొంకణ్‌ తీరమంతటా వర్షం కురిసే అవకాశం ఉందని గురువారం వెల్లడించింది. ఈ నేపథ్యంలో ముంబై, కొంకణ్‌ తీర ప్రాంతాలకు ఆరెంజ్‌ అలెర్ట్‌ జారీ చేసింది.