ఓ అభాగ్యుడికి పోలీసులు చేసిన సపర్యలకు నెటిజన్ల నీరాజనాలు

వర్షంలో తడిసిన ఓ అభాగ్యుడికి మన భాగ్యనగర పోలీసులు చేసిన సపర్యలు చూడటానికి చిన్న పిల్లాడికి చేసినట్లు అతడికి సేవ చేశారు. నెటిజన్ల నీరాజనాలు అందుకుంటున్నారు. బాధితుడు గత మూడు రోజులుగా వర్షంలో తడుస్తూ ఓ దుకాణం ముందు పడుకున్నాడని స్థానికులు చెప్పారు.

హైదరాబాద్‌లోని చాంద్రాయణగుట్ట పోలీస్ స్టేషన్ పరిధిలో ఈ ఘటన జరిగింది. తలదాచుకోవడానికి గూడు లేక వర్షంలో తడిసిపోతున్న ఓ వ్యక్తిని గమనించిన కానిస్టేబుళ్లు బి రమేశ్, ఎండీ సయ్యద్ పరుగు పరుగున అతడి వద్దకు చేరుకున్నారు.

వర్షానికి తడవకుండా అతడిని ఓ హోటల్ వద్దకు తీసుకొచ్చి టీషర్ట్‌తో ఒళ్లు తుడిచారు. ఆ తర్వాత అతడికి షర్ట్ వేశారు. కానిస్టేబుళ్ల సపర్యలు గమనించి అక్కడే ఉన్న స్థానికులు కూడా చేయూత అందించారు. శానిటైజర్‌ను తీసుకొచ్చి పోలీసులకు అందించాడు ఓ వ్యక్తి. జీహెచ్‌ఎంసీలో కరోనా వైరస్ విజృంభిస్తున్న నేపథ్యంలో తమ చేతులు శానిటైజ్ చేసుకున్న కానిస్టేబుళ్లు ఆ వ్యక్తికి కూడా శానిటైజ్ చేశారు.

ఆ తర్వాత అతడికి ఛాయ్ తాగిపించి ఉస్మానియా ఆస్పత్రికి తరలించారు. పోలీసులు అతడి వివరాల గురించి ఆరా తీయగా తన పేరు శేఖర్ అని మాత్రమే చెప్పగలిగినట్లు తెలిపారు. నిర్భాగ్యుడి పట్ల మానవత్వం ప్రదర్శించిన కానిస్టేబుళ్లిద్దరినీ ప్రశంసించారు హోం మంత్రి మహమూద్ అలీ.