కరోనా తీవ్రమైన కేసుల విషయంలో నూరు శాతం పని చేసినట్లు మోడెర్నా కంపెనీ వెల్లడి
By: chandrasekar Tue, 01 Dec 2020 12:02 PM
ఇప్పుడు ప్రపంచం
మొత్తాన్ని కరోనా వైరస్ హడలెత్తిస్తున్న విషయం తెలిసిందే. ఈ వైరస్ బారినుండి
కాపాడుకొనుటకు పలు కంపెనీలు వాక్సిన్ కోసం తీవ్రంగా ప్రయత్నిస్తున్న విషయం
తెలిసిందే. ప్రస్తుతం తమ కరోనా వైరస్ వ్యాక్సిన్ 100 శాతం
సమర్థవంతంగా పని చేస్తోందని అమెరికా కంపెనీ మోడెర్నా ప్రకటించింది. ప్రయోగాల
పూర్తి ఫలితాలు ఈ వ్యాక్సిన్ 94.1 శాతం సమర్థవంతంగా ఉన్నట్లు చూపించాయని, అయితే
తీవ్రమైన కేసుల విషయంలో ఇది 100 శాతం పని చేసినట్లు ఆ మోడెర్నా వెల్లడించింది.
ఈ వాక్సిన్ మంచి ఫలితాలు
ఇవ్వడం వల్ల అమెరికా, యూరప్లలో తమ వ్యాక్సిన్ వాడకానికి క్లియరెన్స్
కోరతామని ఈ కంపెనీ తెలిపింది. వ్యాక్సిన్ అత్యవసర వినియోగానికి అనుమతి
ఇవ్వాల్సిందిగా అమెరికా ఫుడ్ అండ్ డ్రగ్ అడ్మినిస్ట్రేషన్ (ఎఫ్డీఏ)ను కోరనున్నట్లు
మోడెర్నా ఒక ప్రకటనలో చెప్పింది. అంతేకాకుండా మార్కెటింగ్ కోసం యురోపియన్
మెడిసిన్స్ ఏజెన్సీ (ఈఎంఏ)కు దరఖాస్తు చేసుకుంటామని కూడా తెలిపింది. ఈ వాక్సిన్
అందుబాటులోకి వస్తే వైరస్ వ్యాప్తి కూడా గణనీయంగా తగ్గుతుంది.