ఇన్వెస్ట్ తెలంగాణ వెబ్ సైట్ ప్రారంభించిన కేటీఆర్ ..

తెలంగాణకు మరిన్ని పెట్టుబడులు ఆకర్షించే లక్ష్యంతో రూపొందించిన ఇన్వెస్ట్‌ తెలంగాణ అనే వెబ్‌సైట్‌ను మంత్రులు కేటీఆర్‌, జగదీశ్‌రెడ్డి, హరీశ్‌రావు కలిసి ప్రారంభించారు. రాష్ట్రంలో పెట్టుబడులు పెట్టాలనుకునే వారికి కావాల్సిన సమాచారాన్ని పరిశ్రమల శాఖ ఈ వెబ్‌సైట్లో పొందుపరిచనున్నట్లు వారు తెలిపారు. ఈ సందర్భంగా మంత్రి కేటీఆర్‌ మాట్లాడుతూ.. సరళతర వాణిజ్య విధానంలో తెలంగాణ దేశంలోనే మొదటి స్థానంలో ఉందని గుర్తు చేశారు. పెట్టుబడుల ఆకర్షణలో ప్రమోషన్‌ విభాగానికి అత్యంత ప్రాధాన్యత ఉందని అభిప్రాయపడ్డారు..

రాష్ట్రంలో పెట్టుబడులు పెట్టాలనుకొనే పారిశ్రామిక వేత్తలకు ఈ వెబ్‌సైట్‌లో సంపూర్ణ సమాచారం అందించామని వివరించారు. దీనిద్వారా పెట్టుబడిదారులకు మరింత సులువుగా ఉంటుందని అభిప్రాయపడ్డారు. తెలంగాణకు భవిష్యత్తులో మరిన్ని పెట్టుబడులు వచ్చేలా ప్రభుత్వం తరఫున ప్రయత్నిస్తామని మంత్రి హామీ ఇచ్చారు.

ఇప్పటికే వెబ్‌సైట్‌లో పలు సేవలకు సంబంధించిన లైవ్‌ లింక్‌లను ఉంచామని, తద్వారా ఆయా సేవలను పెట్టుబడిదారులు నేరుగా ఈ సౌకర్యాన్ని వాడుకోవచ్చునని కేటీఆర్ చెప్పారు. ఇతర దేశాల నుంచి కూడా పెట్టుబడి దారులు ఆసక్తి చూపుతారు కాబట్టి విదేశీ భాషల్లోనూ వెబ్‌సైట్‌ను రూపొందిస్తామని కేటీఆర్ వివరించారు.