ఎప్పుడైనా జిహెచ్ఎంసి ఎలెక్షన్లు రావొచ్చు సిద్ధంగా ఉండండి ..మంత్రి కేటీఆర్

నవంబరు రెండో వారం తర్వాత ఏ రోజైనా జీహెచ్ఎంసీ ఎన్నికలు వచ్చే అవకాశం ఉంద‌ని, అందుకు అంద‌రూ సర్వ సన్నద్ధంగా ఉండాలని మంత్రి కేటీఆర్ అధికారుల‌ను అప్రమత్తం చేశారు.

హైదరాబాద్‌లో 15 మంది కార్పొరేటర్‌ల పనితీరు బాగాలేదని ఆయన అసంతృప్తి వ్యక్తం చేశారు. గ్రేటర్ ఎన్నికల కోసం ఇటీవల జరిపించిన సర్వేలో ఈ విషయం తెలిసిందని వివరించారు. ఆ కార్పొరేటర్లు ఇప్పటికైనా పనితీరు మార్చుకోవాల‌ని కేటీఆర్ హెచ్చరించారు. మంగ‌ళ‌వారం మినిస్టర్స్ క్వార్టర్స్‌లోని క్లబ్ హౌస్‌లో జీహెచ్ఎంసీ పరిధిలోని ఎమ్మెల్యేలు, ఎమ్మెల్సీలు, కార్పొరేటర్‌లతో మంత్రి కేటీఆర్ సమావేశం నిర్వహించారు.

ఈ స‌మావేశంలో మంత్రి మాట్లాడారు. గ్రేటర్ హైదరాబాద్ అభివృద్ధికి ఇప్పటికే రూ.60 వేల కోట్లు ఖర్చు పెట్టినట్లు మంత్రి గుర్తు చేశారు. కార్పొరేటర్లకు ఇంకా సమస్యలు ఉంటే ఎమ్మెల్యేల దృష్టికి తీసుకురావాలని చెప్పారు. నిత్యం ప్రజల్లో ఉండాల‌ని, ప్రతి గల్లీ తిరిగి సమస్యలు తెలుసుకోవాలని సూచించారు. ప్రతి కార్పొరేటర్ 3 వేల గ్రాడ్యుయేట్ ఓట్లు నమోదు చేయించాలని లక్ష్యం నిర్దేశించారు. అక్టోబర్ 1న ప్రజాప్రతినిధులు అందరూ ఓటు నమోదు చేసుకోవాలని కేటీఆర్ అన్నారు.