తమిళనాడులోని 4 జిల్లాల్లో మళ్లీ జూన్ 19 నుండి 30 వరకు లాక్‌డౌన్ విధింపు

కరోనా కేసులు పెరుగుతున్న వేళ తమిళనాడు ప్రభుత్వం కీలక నిర్ణయం తీసుకుంది. చెన్నై పరిధిలోని నాలుగు జిల్లాల్లో జూన్ 19 నుండి 30 వరకు లాక్‌డౌన్ విధించింది. భారతదేశంలో రెండవ అతిపెద్ద కరోనావైరస్ రాష్ట్రం తమిళనాడు. తమిళనాడులో ఇప్పటివరకు మొత్తం బాధితుల సంఖ్య 44,661 కు పెరిగింది. చెన్నైలో కరోనావైరస్ బారిన పడిన వారి సంఖ్య 31,896.

తమిళనాడులో పెరుగుతున్న కరోనా ప్రభావంపై చర్చించడానికి ఈ రోజు తమిళనాడు కేబినెట్ సమావేశం జరిగింది. సంప్రదింపుల తరువాత, వైద్య నిపుణుల బృందం కరోనావైరస్ వ్యాప్తిని నియంత్రించడానికి ఉచ్చులను బిగించాలని సూచించింది. తమిళనాడు ప్రభుత్వం జూన్ నెలలోనే మరోసారి లాక్‌డౌన్ ప్రకటించింది. చెన్నై మెట్రో పాలిటన్ నగర పరిధిలోకి వచ్చే నాలుగు జిల్లాల్లో జూన్ 19 నుంచి 30 వరకు లాక్‌డౌన్ విధిస్తున్నట్లు ముఖ్యమంత్రి పళనిస్వామి ప్రకటించారు. చెన్నై, కాంచీపురం, చెంగల్‌పట్టు, తిరువళ్లూరు జిల్లాల్లో ఈ లాక్‌డౌన్ అమల్లో ఉంటుందని తెలిపారు. ఈ జిల్లాల్లో లాక్‌డౌన్ నిబంధనలు పూర్తి స్థాయిలో అమల్లో ఉంటాయని స్పష్టం చేశారు.

కరోనా ఉద్ధృతి అధికంగా ఉన్న నాలుగు జిల్లాలో మరోసారి పూర్తిగా లాక్‌డౌన్‌ విధిస్తూ తమిళనాడు రాష్ట్ర కేబినెట్‌ సోమవారం, జూన్ 15 న నిర్ణయం తీసుకుంది. లాక్‌డౌన్‌ సమయంలో ఆయా జిల్లాల్లో ఉదయం 6 గంటల నుంచి 2 గంటల వరకు మాత్రమే నిత్యావసరాల కొనుగోలుకు ప్రభుత్వం అనుమతి ఇచ్చింది. ఆదివారాల్లో ప్రజలెవరినీ బయటకు అనుమతించవద్దని పూర్తి స్థాయిలో లాక్‌డౌన్ అమలు చేయాలని సూచించింది.

ఆస్పత్రులు, వైద్య పరీక్షా కేంద్రాలు, అంబులెన్స్ సేవలు యథావిధిగా నడుస్తున్నాయి. ప్రజా రవాణాను పూర్తిగా నిలిపివేయాలని అధికారులను ఆదేశించింది. హోటళ్లు, రెస్టారెంట్లలో పార్సిల్ సేవలకు మాత్రమే అనుమతి ఇచ్చింది. 33 శాతం ఉద్యోగులతోనే ప్రభుత్వ కార్యాలయాల్లో కార్యకలాపాలు నిర్వహించేలా రాష్ట్ర ప్రభుత్వం ఆదేశాలిచ్చింది.