ఢిల్లీలో ఇస్లామిక్ స్టేట్ ఆఫ్ ఇరాక్, సిరియా (ఐసిస్) ఉగ్రవాది పట్టుబడ్డాడు..

ఐఎస్ ఉగ్రవాది అబూ యూసుఫ్‌ని ఢిల్లీ పోలీసులు శనివారం అరెస్ట్ చేశారు. ధౌలా కువాన్, కరోల్ బాగ్ ప్రాంతంలో జరిగిన ఎదురు కాల్పుల తర్వాత ఉగ్రవాదిని అరెస్ట్ చేసినట్టు ప్రత్యేక బృందం డిప్యూటీ కమిషనర్ ఆఫ్ పోలీస్ తెలిపారు. అరెస్ట్ సమయంలో ఉగ్రవాది వద్ద పేలుడు పదార్థాలు కూడా లభించినట్టు పోలీసులు తెలిపారు. రిడ్జ్ రోడ్డు ప్రాంతంలోని బుద్ధ జయంతి పార్క్ వద్ద ఉగ్రవాదిని అదుపులోకి తీసుకున్నారు. ఆ ప్రాంతంలో ముందు జాగ్రత్త చర్యగా భద్రతా దళాలను మోహరించారు. నేషనల్ సెక్యూరిటీ గార్డ్స్‌కు చెందిన కమాండోలు తమ ఆధీనంలోకి తెచ్చుకున్నాయి. డ్రోన్‌ల సాయంతో బాంబ్ స్క్యాడ్ తనిఖీలు నిర్వహిస్తోంది.

ఐఎస్ ఉగ్రవాదిని అరెస్ట్ చేశామని, అతడి వద్ద పేలుడు పదార్థాలు లభించాయని చెప్పారు. నేషనల్ సెక్యూరిటీ గార్డ్, బాంబ్ డిస్పోజల్ స్క్వాడ్ అక్కడ పరిస్థితిని సమీక్షిస్తోందని తెలిపారు. రెండు రోజుల క్రితమే ఐఎస్ ఉగ్రవాద సంస్థతో సంబంధాలున్న ఓ వైద్యుడ్ని బెంగళూరులో జాతీయ దర్యాప్తు బృందం అరెస్ట్ చేసింది. బెంగళూరుకు చెందిన అబ్దుల్‌ రహమాన్‌ (28) రామయ్య మెడికల్ కాలేజీ ఆప్తమాలజీ విభాగంలో జూనియర్‌ వైద్యుడిగా పనిచేస్తున్నాడు. యుద్ధంలో గాయపడిన ఐసిస్ ఉగ్రవాదులకు వైద్య సాయం చేయడమే కాదు, ఓ మెడికల్ యాప్ రూపొందించి ఆయుధాల సమాచారానికి సంబంధించిన వివరాలను అందజేసినట్టు ఎన్ఐఏ దర్యాప్తులో తేలింది.