నీరవ్ మోడీ భార్య అమీ మోడీపై ఇంటర్పోల్ మంగళవారం రెడ్ కార్నర్ నోటీసు జారీ

గుజరాత్లో ప్రముఖ వజ్రాల వ్యాపారి ఆర్ధిక నేరాలకు పాల్పడి లండన్ లో తలదాచుకుంటున్న నేరగాడు నీరవ్ మోడీ భార్య అమీ మోడీపై ఇంటర్‌పోల్ మంగళవారం రెడ్ కార్నర్ నోటీసు జారీ చేసినట్లు తెలుస్తున్నది. భారతదేశంలో అమీ మోడీకి మనీలాండరింగ్ కేసులకు సంబంధించి నోటీసు జారీ చేశారు. ఈ కేసును దర్యాప్తు చేస్తున్న ఎన్‌ఫోర్స్‌మెంట్ డైరెక్టరేట్ అభ్యర్థన ఆధారంగా అమీ మోడీకి వ్యతిరేకంగా నోటీసు జారీ చేశారు. నీరవ్ మోడీ, అతని సోదరుడు నేహాల్ మోడీ, సోదరి పూర్వి మోడీపై కూడా రెడ్ కార్నర్ నోటీసులు జారీ చేశారు. ఈ ఏడాది ఫిబ్రవరిలో ఎన్‌ఫోర్స్‌మెంట్ డైరెక్టరేట్ దాఖలు చేసిన అనుబంధ ఫిర్యాదులో ఆయన భార్య అమీ మోడీ పేరు పెట్టారు. న్యూయార్క్ సెంట్రల్ పార్క్‌లో ఒక ఫ్లాట్‌ను 30 మిలియన్ డాలర్లకు కొనుగోలు చేసినందుకు అమీ మోడీ కూడా మనీలాండరింగ్ ఆరోపణలు ఎదుర్కొంటున్నారు.

పంజాబ్ నేషనల్ బ్యాంకు కుంభకోణంపై దర్యాప్తు సంస్థలు తమ దర్యాప్తు ప్రారంభించకముందే అమీ మోడీ తన భర్త, ఇతర కుటుంబ సభ్యులతో కలిసి 2018 జనవరిలో భారతదేశం విడిచి వెళ్లారని తెలుస్తుంది. ఆమె ప్రస్తుతం యునైటెడ్ స్టేట్స్ లో ఉన్నట్లు సమాచారం. పంజాబ్ నేషనల్ బ్యాంక్‌ను రూ .13 వేల కోట్లకు పైగా మోసం చేసినట్లు నీరవ్ మోడీపై ఆరోపణలు ఉన్నాయి. ఈ కేసులో అతని మామ మెహుల్ చోక్సీ కూడా ప్రధాన నిందితుడు. మోడీ 2018 లో యునైటెడ్ కింగ్‌డమ్‌కు పారిపోయారు. వారితో పాటే నీరవ్ భార్య అమీ మోడీ కూడా వెళ్ళారని సమాచారం. పారిపోయిన వ్యాపారవేత్తలు నీరవ్ మోడీ, మెహుల్ చోక్సీ యాజమాన్యంలోని విదేశీ సంస్థలకు చెందిన వజ్రాలు, ముత్యాలు, వెండి ఆభరణాలను తిరిగి భారత్‌కు తీసుకువచ్చినట్లు జూన్‌లో ఎన్‌ఫోర్స్‌మెంట్ డైరెక్టరేట్ తెలిపింది.

వారు తీసుకొచ్చిన ఆభరణాల విలువ రూ .1,350 కోట్లు అని దర్యాప్తు సంస్థతెలిపింది.రెడ్ కార్నర్ నోటీసు అనేది అప్పగించడం, లొంగిపోవటం లేదా ఇలాంటి చట్టపరమైన చర్యలను తీసుకునే క్రమంలో చాలా కాలంపాటు దొరక్కుండా పెండింగ్‌లో ఉన్న వ్యక్తిని గుర్తించి తాత్కాలికంగా అరెస్టు చేయమని ప్రపంచవ్యాప్తంగా చట్ట అమలుకు చేసే ఒక అభ్యర్థన. ఇది అంతర్జాతీయ అరెస్ట్ వారెంట్‌గా పనిచేస్తుంది. ఆగస్టు 7 న, లండన్లోని వెస్ట్ మినిస్టర్ మేజిస్ట్రేట్ కోర్టు నీరవ్ మోడీపై ఆగస్టు 27 వరకు రిమాండ్ విధించింది. తదుపరి విచారణ సెప్టెంబర్ 7 నుండి ఐదు రోజుల పాటు జరగనుంది . 2018 లో యునైటెడ్ కింగ్‌డమ్‌కు పారిపోయిన వ్యాపారవేత్త నీరవ్ మోడీని ఈ ఏడాది ప్రారంభంలో లండన్‌లో అరెస్టు చేశారు. అరెస్టు చేసినప్పటి నుంచి అతని న్యాయవాదులు నాలుగు బెయిల్ పిటీషన్ లను దాఖలు చేశారు. అయితే అతను పారిపోయే ప్రమాదం ఉండడంతో వాటిని తిరస్కరించారు. పంజాబ్ నేషనల్ బ్యాంకు కుంభకోణం లో మనీలాండరింగ్ కేసులకు సంబంధించి అతనిని భారత్ కు తీసుకురావడానికి తీవ్ర ప్రయత్నాలు జరుగుతున్నాయి.