చర్మ క్యాన్సర్‌ తొలగించేందుకు బ్యాండేజీని కనుగొన్నఇండియన్‌ ఇన్‌స్టిట్యూట్‌ ఆఫ్‌ సైన్స్‌

బెంగళూరు: బెంగళూరులోని ఇండియన్‌ ఇన్‌స్టిట్యూట్‌ ఆఫ్‌ సైన్స్ చర్మ క్యాన్సర్‌ కు ఒక కొత్త రకం బ్యాండేజీని కనిపెట్టింది. ఈ బ్యాండేజీని చర్మంపై వేసుకోవడం వల్ల దీనిలో మ్యాగ్నెటిక్‌ నానోఫైబర్లు ఆటోమేటిక్‌గా వేడెక్కి చర్మ క్యాన్సర్‌ కణాలను తొలగిస్తాయి. చర్మ క్యాన్సర్ అంటే చర్మ కణాల అనియంత్రిత పెరుగుదల. బలహీనమైన డీఎన్‌ఏ చర్మ కణాలను దెబ్బతీసినప్పుడు స్కిన్‌ క్యాన్సర్‌ వస్తుంది.

సాధారణంగా సూర్యరశ్మికి గురికాకుండా ఉండే చర్మ ప్రాంతాలపై చర్మ క్యాన్సర్ వస్తుంది. చర్మ క్యాన్సర్ ప్రమాదాన్ని పరిమితం చేయడం ద్వారా లేదా అతినీలలోహిత వికిరణానికి గురికాకుండా ఉండాలనుకుంటే ప్రారంభ దశలో చర్మ క్యాన్సర్‌ను గుర్తించాలి. చర్మాన్ని ఎప్పటికప్పుడు తనిఖీ చేస్తుండాలి. ఈ క్యాన్సర్‌ను ముందుగా గుర్తించడం వల్ల మంచి చికిత్స అందించే వీలుంటుంది.

ప్రస్తుతం స్కిన్‌ క్యాన్సర్‌కు శస్త్రచికిత్స, రేడియేషన్, కెమోథెరపీతో చికిత్స అందిస్తున్నారు. చర్మ క్యాన్సర్‌కు కొన్ని సందర్భాల్లో హైపర్థెర్మియా చికిత్స కూడా ఇస్తున్నారు. అయితే, దీనికి భిన్నంగా మ్యాగ్రెటిక్‌ నానోఫైబర్లతో కూడిన బ్యాండేజీని చర్మంపై అతికించుకోవడం వల్ల వేడెక్కి చర్మ క్యాన్సర్‌ కణాలను నాశనం చేస్తుంది. బ్యాండేజీలో ఇనుము యొక్క ఆక్సిడైజ్డ్ నానోపార్టికల్స్, సర్జికల్ టేప్‌లో అమర్చిన బయోడిగ్రేడబుల్ పాలిమర్లు ఉంటాయి. ఈ టేప్ అయస్కాంత క్షేత్రాన్ని పొందినప్పుడు, అందులోని పదార్థాలు వేడెక్కి క్యాన్సర్ కణాలను తొలగించడానికి పనిచేస్తుందని ఇండియన్‌ ఇనిస్టిట్యూట్‌ ఆఫ్ సైన్స్‌ శాస్త్రవేత్తలు పేర్కొన్నారు.

బ్యాండేజీ నుంచి వెలువడే వేడి చర్మ క్యాన్సర్‌ను ఎలా నయం చేస్తుందో తెలుసుకోవడానికి శాస్త్రవేత్తలు రెండు ప్రయోగాలు చేశారు. మొదటి ప్రయోగం మానవుల క్యాన్సర్ కణాలపై నేరుగా జరిగింది. రెండవది ఎలుకలపై జరిగింది. కృత్రిమ క్యాన్సర్ కణాలను ఎలుకలోకి చేర్చి పరిశోధనలు జరిపారు. రెండు ప్రయోగాల్లో బ్యాండేజీ నుంచి విడుదలయ్యే వేడి క్యాన్సర్ కణాలను చంపినట్లు గుర్తించారు. అలాగే, ఆరోగ్యకరమైన కణాలపై ఎటువంటి ప్రతికూల ప్రభావం లేదని నిర్ధారించారు.