తెలంగాణాలో భారీ నుంచి అతి భారీ వర్షాలు ..

తెలంగాణకు మరిన్ని వర్షాలు పడతాయని వాతావరణ శాఖ పేర్కొంది. రాష్ట్రంలో భారీ నుంచి అతిభారీ వర్షాలు కురుస్తాయన్న వాతావరణశాఖ సూచనల నేపధ్యంలో ముఖ్యమంత్రి కేసీఆర్‌ అధికారులకు పలు ఆదేశాలు జారీ చేశారు. ఈ మేరకు ప్రభుత్వ ప్రధాన కార్యదర్శి సోమేశ్‌కుమార్‌ జిల్లాల కలెక్టర్లు, ఎస్పీలను అప్రమత్తం చేశారు.

ఉమ్మడి ఆదిలాబాద్‌, కరీంనగర్‌, నిజామాబాద్‌, వరంగల్‌, ఖమ్మం జిల్లాలకు భారీ నుంచి అతి భారీ వర్షాలు కురిసే అవకాశం ఉన్నట్టు వాతావరణశాఖ హెచ్చరించింది. దీంతో లోతట్టు ప్రాంతాల్లో నీటి ప్రవాహం, నీరు నిలిచే అవకాశం ఉందని, భారీ వర్షాలతో విద్యుత్‌స్తంభాలు , చెట్లు విరిగిపడి ఆస్తి, ప్రాణనష్టం జరిగే అవకాశం ఉన్నందున అధికారులు పలు జాగ్రత్తలు తీసుకోవాలని కలెక్టర్లను ఆదేశించారు.

మరోవైపు ప్రాజెక్ట్‌లు, రిజర్వాయర్‌లు ఓవర్‌ ఫ్లో వల్ల లోతట్టు ప్రాంతాల్లో జలమయం అయ్యే అవకాశం ఉంది. ఆయా ప్రాంతాల ప్రజలను ఎప్పటికప్పుడు అప్రమత్తం చేయాలని అన్నారు. కలెక్టర్లు, ఎస్పీలు, జిల్లాఉన్నతాధికారులు అప్రమత్తంగా ఉండి ఫ్లడ్‌ ప్రోటోకాల్‌ను పాటించి తగు సూచనలు, సలహాలు చేయాలి.

లో లెవల్‌ బ్రిడ్జ్‌ , కాజ్‌వేలపై ప్రత్యేక దృష్టి సారించాలని, పాదచారులు నడవకుండా నిషేధం విధించాలన్నారు. ఎటువంటి ప్రాణ నష్టం సంభవించకుండా చర్యలు చేపట్టాలని ప్రధాన కార్యదర్శి తెలిపారు. భారీ వర్షాలతో అవాంఛనీయ ఘటనలు జరిగితే ఎప్పటికప్పుడు రిపోర్ట్‌చేయాలని సీఎస్‌ సోమేశ్‌కుమార్‌ జిల్లా కలెక్టర్లను ఆదేశించారు.