Breaking: హైదరాబాద్ లో భారీ వర్షం... కిలోన్నర బంగారం ఉన్న బ్యాగు వరద నీటిలో గల్లంతు...!

బంగారు ఆభరణాలు వరద నీటిలో గల్లంతైన ఘటన హైదరాబాద్‌లో చోటుచేసుకుంది. గత కొన్ని రోజులుగా హైదరాబాద్‌లో భారీ వర్షాలు కురుస్తున్నాయి. ఎడతెరిపి లేకుండా కురుస్తున్న వానలకు నగరంలో వాగులు వంకలు పొంగి పొర్లుతున్నాయి. లోతట్టు ప్రాంతాలన్నీ జలమయం అయ్యాయి.

బంగారు ఆభరణాలతో వర్షంలో వెళ్తున్న ఓ వ్యక్తి బ్యాగు నీటిలో కొట్టుకుపోయింది. బంజారాహిల్స్‌ డీఐ మహ్మద్‌ హఫీజుద్దీన్‌ వివరాల ప్రకారం.. బషీర్‌బాగ్‌లోని వీఎస్‌ గోల్డ్‌ ఆభరణాల దుకాణదారుడు జూబ్లీహిల్స్‌లోని కృష్ణ పెరల్స్‌ దుకాణానికి ఓ కొనుగోలుదారు కోసం కిలోన్నర ఆభరణాలను పంపారు. సేల్స్‌మెన్‌ ప్రదీప్‌కు ఇచ్చి శనివారం ఉదయం ఆభరణాల్ని పంపారు.

పని పూర్తయ్యాక.. సాయంత్రం వచ్చి ఆభరణాల సంచి తీసుకున్న ప్రదీప్‌ తన బైకుపై బంజారాహిల్స్‌ రోడ్‌ నంబరు 3 మీదుగా వర్షంలోనే బయల్దేరాడు. స్థానిక కిడ్స్‌ పాఠశాల ముందుకు రాగానే వరద నీరు భారీగా వచ్చింది. దీంతో కాళ్ల మధ్యలో పెట్టుకున్న ఆభరణాల సంచి ప్రవాహంలో కొట్టుకుపోయింది.

దుకాణ యజమానితోపాటు 15 మంది సిబ్బంది శనివారం రాత్రి 10 వరకు వెతికారు. అయితే బ్యాగు చిక్కినా నగలు మాత్రం కనిపించలేదు. దుకాణ యజమాని అజయ్‌కుమార్‌ ఫిర్యాదుతో పోలీసులు కేసు దర్యాప్తు చేస్తున్నారు. ప్రదీప్‌ను కూడా విచారిస్తున్నారు. సంచిలోని నగలు ఏమయ్యాయనేది ఉత్కంఠ నెలకొంది.