తక్కువ వడ్డీకే రుణాలిస్తున్న హెచ్‌డిఎఫ్‌సి బ్యాంక్

దేశంలోని అతిపెద్ద ప్రైవేట్ బ్యాంక్ హెచ్‌డిఎఫ్‌సి కీలక నిర్ణయం తీసుకుంది. రుణ రేట్లను బ్యాంక్ 0.10 శాతం తగ్గించింది. కొత్త రేట్లు శుక్రవారం అంటే ఆగస్టు 7 నుండి అమల్లోకి వచ్చాయి. బ్యాంక్ తీసుకున్న ఈ నిర్ణయంతో వినియోగదారులందరూ ఆనందం వ్యక్తం చేస్తున్నారు. బ్యాంక్ తీసుకున్న తాజా నిర్ణయంతో గృహ, ఆటో, వ్యక్తిగత రుణాల EMI 0.10 శాతం తగ్గింది. ఆగస్టు 4, మంగళవారం, యూనియన్ బ్యాంక్ ఆఫ్ ఇండియా కూడా వడ్డీ రేట్లను తగ్గించాలని నిర్ణయించిన విషయం తెలిసిందే. యుబిఐ జీతాలు ఉన్నవారికి గృహ రుణ రేట్లను 6.7 శాతానికి తగ్గించింది.

యూనియన్ బ్యాంక్ ఇచ్చిన సమాచారం ప్రకారం, నెలజీతం అందుకునే ఉద్యోగులకు 30 లక్షల వరకు గృహ రుణాలపై 6.7 శాతం వడ్డీని మాత్రమే చెల్లించాల్సి ఉంటుంది.

మరోవైపు ప్రముఖ ప్రభుత్వ రంగ బ్యాంక్ కెనరా బ్యాంక్ సైతం వడ్డీరేట్లను తగ్గించింది. కెనరా బ్యాంక్ గురువారం తన ఫండ్ యొక్క ఉపాంత వ్యయ ఆధారిత వడ్డీ రేటు ను వివిధ కాలాలకు 0.30 శాతం తగ్గించింది. ఒక రోజు, ఒక నెల రుణ రేట్లు 0.20 శాతం తగ్గించి ఏడు శాతానికి తగ్గించినట్లు కెనరా బ్యాంక్ తెలిపింది. తగ్గించిన వడ్డీ రేట్ల ప్రకారం మూడు నెలల ఎంసిఎల్‌ఆర్‌లో 0.30% తగ్గింపు లభిస్తుంది. రిజర్వు బ్యాంక్ గవర్నర్ శక్తికాంత్ దాస్ నేతృత్వంలోని ఆరుగురు సభ్యుల ద్రవ్య విధాన కమిటీ (ఎంపిసి-ద్రవ్య విధాన కమిటీ) వడ్డీ రేట్లను మార్చకూడదని గురువారం నిర్ణయించింది. వడ్డీ రేట్లను యధాతథంగా కొనసాగిస్తున్నట్లు తెలిపింది. రెపో రేటు 4% వద్ద ఉంది. ఈ విషయాన్ని ఎంపిసి ఏకగ్రీవంగా నిర్ణయించింది. రివర్స్ రెపో రేటు 3.35 శాతంగా ఉంది. ఎంఎస్‌ఎఫ్, బ్యాంక్ రేట్ 4.25% వద్ద ఉంది.