ప్రపంచ అగ్ర శాస్త్రవేత్తల జాబితాలో భారతీయులదే హవా!

వివిధ రంగాలలో ప్రపంచంలోని టాప్ 2 పర్సెంట్‌ శాస్త్రవేత్తల జాబితాను స్టాన్‌ఫర్డ్ విశ్వవిద్యాలయం సిద్ధం చేసింది. ఈ జాబితాలో భారతదేశానికి చెందిన 1000 మంది శాస్త్రవేత్తలు చోటు దక్కించుకున్నారు. టాప్‌ 2 శాతం శాస్త్రవేత్తల్లో యూజీసీ వైస్ చైర్మన్ డాక్టర్ భూషణ్ పట్వర్ధన్, ఇండియన్ సైన్స్ కాంగ్రెస్ అసోసియేషన్ మాజీ జనరల్ ప్రెసిడెంట్ ప్రొఫెసర్ కేఎస్ రంగప్ప తదితరులు ఉన్నారు. అనులేఖనాల సమాచారం, హెచ్-ఇండెక్స్, సహ రచయిత, మిశ్రమ సూచిక వంటి ప్రామాణికాల ఆధారంగా స్టాన్‌ఫోర్డ్ నిపుణులు అగ్ర శాస్త్రవేత్తల జాబితాను రూపొందించారు.

ఈ జాబితాలో చాలా మంది ప్రముఖ భారతీయ శాస్త్రవేత్తలు ఉన్నారు. మెజారిటీ ఐఐటీలు, ఐఐఎస్సీ, ఇతర ఉన్నత సంస్థల నుంచి భౌతికశాస్త్రం, మెటీరియల్ సైన్సెస్, కెమికల్ ఇంజనీరింగ్, ప్లాంట్ బయాలజీ, ఎనర్జీ మొదలైన రంగాల నుంచి ఉన్నారు. ఈ శాస్త్రవేత్తలందరినీ 22 శాస్త్రీయ రంగాలుగా, 176 ఉప రంగాలుగా వర్గీకరించారు. ఈ నివేదిక డాక్టర్ జాన్ ఐయోనిడిస్ నాయకత్వంలో రూపొందించబడింది. ప్రపంచంలోని టాప్ శాస్త్రవేత్తలపై నివేదికను పీఎల్‌ఓఎస్‌ బయాలజీలో ప్రచురించారు.

టాప్ శాస్త్రవేత్తల లిస్ట్ లో ఉన్న భారతీయులు:

డాక్టర్ ఆర్‌ఐ మషెల్కర్ (గాంధేయ ఇంజినీరింగ్‌ మార్గదర్శకుడు), అహ్మద్ కమల్ (జామియా హమ్‌దార్డ్ ప్రో-ఛాన్సలర్), అంబుజ్ సాగర్, డీకే శర్మ, కేఏ సుబ్రమణ్యం (ఐఐటీ ఢిల్లీ), ప్రొఫెసర్ రాకేశ్ అగర్వాల్, (ప్రస్తుతం జిప్మర్ పుదుచ్చేరి డైరెక్టర్‌గా డిప్యుటేషన్‌లో ఉన్నారు), డాక్టర్ విద్యా అరంకల్లె (నేషనల్ ఇన్స్టిట్యూట్ ఆఫ్ వైరాలజీలో మాజీ డైరెక్టర్ గ్రేడ్ శాస్త్రవేత్తలు), డాక్టర్ భూషణ్ పట్వర్ధన్ (యూనివర్శిటీ గ్రాంట్స్ కమిషన్ వైస్ చైర్మన్), డాక్టర్ టీ పద్మనాభన్ (సైద్ధాంతిక భౌతిక శాస్త్రవేత్త), డాక్టర్ నరేష్ డాడిచ్ (ఐయూసీఏఏ) డాక్టర్ సుందీప్ సాల్వి, డాక్టర్ సీఎస్ యాజ్నిక్ (శ్వాసకోశ ఔషధం, మధుమేహం రంగం), ఏకే శ్రీవాస్తవ, దీపక్ కుమార్, విష్ణు జే రామ్ (లక్నో విశ్వవిద్యాలయం), అశోక్ పాండే, కున్వర్ పీ సింగ్, రికాబ్ సీ శ్రీమల్, వై శుక్లా, బీఎస్ ఖంగరోట్, పూనమ్ కక్కర్, బిశ్వరూప్ దాస్ (ఐఐటీ రూర్కీ), ప్రొఫెసర్ కేఎస్ రంగప్ప (మైసూర్ విశ్వవిద్యాలయం మాజీ వైస్-ఛాన్సలర్, ఇండియన్ సైన్స్ కాంగ్రెస్ అసోసియేషన్ గత జనరల్ ప్రెసిడెంట్), ప్రొఫెసర్ రంజన్ బోస్ (ఇంద్రప్రస్థ ఇన్‌స్టిట్యూట్ ఆఫ్ ఇన్ఫర్మేషన్ టెక్నాలజీ-ఢిల్లీ డైరెక్టర్, వర్చువల్ ల్యాబ్స్ పై మిషన్ ప్రాజెక్ట్ కోసం జాతీయ సమన్వయకర్త, విక్రమ్ సారాభాయ్ రీసెర్చ్ అవార్డు గ్రహీత), ప్రొఫెసర్ జీపీఎస్ రాఘవ (బయో ఇన్ఫర్మేటిషియన్, ఇంద్రప్రస్థ ఇన్స్టిట్యూట్ ఆఫ్ ఇన్ఫర్మేషన్ టెక్నాలజీలో కంప్యూటేషనల్ బయాలజీ విభాగం అధిపతి, 2008 లో శాంతి స్వరూప్ భట్నాగర్ సైన్స్ అండ్ టెక్నాలజీ బహుమతి గ్రహీత).