బిగ్‌బాస్‌ హౌసలో గంగవ్వ ప్రత్యేకం

గంగవ్వ.. సోషల్ మీడియా ద్వారా తెలుగు ప్రేక్షకులకు దగ్గరైన సహజ నటి. ఆమె గొంతులో ఏదో ఆకర్షణ.. ఆమె మాట్లాడుతుంటే మన అవ్వ మాట్లాడిన అనుభూతి. అందుకే, ఆమె అతి తక్కువ కాలంలోనే యూట్యూబ్ స్టార్‌గా ఎదిగారు. బోలెడంత పాపులారిటీ సంపాదించుకున్నారు. లేటు వయసులో ఆమెకు మంచి పాపులారిటీ వచ్చినా.. చిన్న వయసులో ఆమె ఎన్నో కష్టాలు పడ్డారు. ఆ కష్టాలను ఆమె నాగార్జున ముందు చెప్పుకున్నారు.
అక్కినేని నాగార్జున హోస్ట్‌గా వ్యవహరిస్తోన్న బిగ్ బాస్ సీజన్ 4 ఆదివారం (సెప్టెంబర్ 6న) ప్రారంభమైంది. మొత్తం 16 మంది కంటెస్టెంట్లు బిగ్ బాస్ హౌజ్‌లోకి అడుగుపెట్టారు. వీళ్లలో గంగవ్వ కూడా ఉన్నారు. 16వ కంటెస్టెంట్‌గా ఆమె హౌజ్‌లోకి వెళ్లారు. ఆమె చాలా ప్రత్యేకమైన హౌజ్‌మేట్ అని, ఆమెను చాలా జాగ్రత్తగా చూసుకోవాలని హౌజ్‌మేట్స్ అందరికీ నాగార్జున చెప్పారు. అంతేకాదు, గంగవ్వను జాగ్రత్తగా చూసుకోకపోతే పనిష్మెంట్లు తప్పవని వార్నింగ్ కూడా ఇచ్చారు.
అయితే, గంగవ్వను వేదికపైకి పిలిచే ముందు ఆమె ఏవీని వేసి చూపించారు నాగార్జున. ఈ ఏవీలో తన గురించి గంగవ్వ చెప్పుకొచ్చారు. ‘‘నా పేరు గంగవ్వ. నేపు పుట్టింది పొలాసలో (తెలంగాణలోని జగిత్యాల జిల్లా). నేను బడ్డది (మెట్టినిల్లు) లంబాడిపల్లెలో. పడుడు ఎట్లంటే.. నేను ఐదేండ్లప్పుడు. మా ఆయన ఏడేండ్లోడు. చిన్నప్పుడే అయినై పెండ్లిళ్లు. ఐదేండ్లప్పుడు పెళ్లయినదాన్ని నాకు ఏం ఎరిక’’ అని గంగవ్వ వెల్లడించారు. తన భర్త, మామ చనిపోయిన తరవాత తమను ఎవ్వరూ దగ్గరకు తీసుకోలేదని కంటతడి పెట్టారు గంగవ్వ. తినడానికి తిండి కూడా ఉండేది కాదన్నారు.
తన భర్త దుబాయ్ వెళ్తానంటే.. అప్పులు చేసి దుబాయ్ పంపానని గంగవ్వ చెప్పారు. ఏడేళ్లు దుబాయ్‌లో ఉన్న తన భర్త ఒక్క రూపాయి పంపలేదని.. అక్కడే చచ్చిపోయాడమో అనుకున్నానని గంగవ్వ వెల్లడించారు. ‘‘ఒక బిడ్డకు పిట్స్ వచ్చింది. పైసల్లేవ్. దవాఖానలో అప్పుడు బాగా శ్రద్ధ చేయలేదు. దవాఖానాలో చనిపోతే ఇంటికి ఎత్తుకొని వచ్చినా నడిచి’’ అని గంగవ్వ తెలిపారు. తనకు రూ.8 లక్షల అప్పు ఉండేదని.. మూడేళ్లు కష్టపడి తీర్చానని చెప్పారు.
‘‘ఒక చిన్నది కెమెరా పట్టుకుంటా వచ్చి పొలాల కాడ, సేన్ల కాడ, చెట్ల కాడ తీసుడుబెట్టింది. యాక్టింగ్ మంచిగుంది.. గొంతు మంచిగుంది అని అన్నది. తీసుకుంటా తీసుకుంటా పోతే.. ఎంతోకొంత జీతమిచ్చుకుంటూ వత్తండ్రు. చిన్న బతుకు మాకు ఒకప్పుడు.. ఇప్పుడు కొంత విలువకొచ్చె నా బతుకు. అది దేవుని దయ వల్ల అని అనిపిత్తది’’ అని గంగవ్వ చెప్పుకొచ్చారు. వర్షం వస్తే ఇళ్లంతా కారిపోతుందని.. ఓవైపు వంటచేసుకుంటూనే, మరోవైపు బక్కెట్లు పెట్టుకుని వర్షం నీళ్లు పారబోస్తూ ఉంటానని గంగవ్వ తన కష్టాన్ని చెప్పుకున్నారు. ఈ బిగ్ బాస్‌ ద్వారా వచ్చిన డబ్బుతో ఒక ఇల్లు కట్టుకొని, బుక్కెడు అన్నం తింటే అదే చాలని గంగవ్వ అన్నారు.
Also Read: నాకు రెండుసార్లు పెళ్లి.. వాడికోసమే బిగ్ బాస్‌కి వచ్చా: యాంకర్ లాస్య
ఇక బిగ్ బాస్ వేదికపైకి వచ్చిన గంగవ్వ.. నాగార్జునతో అదే జోష్‌తో మాట్లాడారు. ‘‘నీ కొడుకుతో చేసినా.. నీ కోడలితో ఎంట్రీ ఇచ్చినా’’ అంటూ బేస్ వాయిస్‌తో నాగార్జునను నవ్వించారు. ‘‘మరి ఏమనుకోకురిగాని నేనొక ముచ్చటడుగుతా.. మీ కొడుకులు మీరు జూత్తే సేమ్ అన్నదమ్ముల లెక్కే కొడతారు’’ అని నాగార్జునకు బిస్కెట్ వేశారు గంగవ్వ.

ఇక, పట్టుచీర కట్టుకుని వచ్చిన గంగవ్వ.. తాను పుట్టిన దగ్గర నుంచీ ఇలాంటి చీర ఎప్పుడూ కట్టుకోలేదని నాగార్జునకు చెప్పారు. ‘‘మీరు కొన్నారు గింత మంచిది. మెరుత్తాంది.. ఈ చీర మాకు ఎన్నడు ఎరికలేదు’’ అని గంగవ్వ నవ్వించారు.