ప్రముఖ దర్శకుడు, నిర్మాత, నటుడు కరణ్ జోహార్ ఇంట్లో ఇద్దరికి కరోనా

బాలీవుడ్ ప్రముఖ దర్శకుడు, నిర్మాత, నటుడు కరణ్ జోహార్ ఇంట్లో ఇద్దరికి కరోనా పాజిటివ్ వచ్చింది. ఆయన ఇంట్లో పనిచేసే స్టాఫ్‌లో ఇద్దరికి కోవిడ్-19 పాజిటివ్ నిర్ధారణ అయినట్టు కరణ్ జోహార్ స్వయంగా వెల్లడించారు. ఈ మేరకు సోమవారం రాత్రి ట్విట్టర్ ద్వారా ఆయన ప్రకటించారు.

ప్రభుత్వ నిబంధనల మేరకు అన్ని జాగ్రత్తలు తీసుకున్నామని ఆయన స్పష్టం చేశారు. మా ఇంట్లో పనిచేసే స్టాఫ్‌‌‌లో ఇద్దరికి కోవిడ్-19 పరీక్షలు చేయగా పాజిటివ్ అని తేలింది. వారిలో లక్షణాలు కనిపించిన వెంటనే మా ఇంట్లోని ఒక గదిలో వారిని క్వారంటైన్‌లోకి పంపాం. బృహత్ ముంబై మున్సిపల్ కార్పోరేషన్ (BMC)కి తక్షణమే ఈ విషయాన్ని తెలియజేశాం. నా భవనం మొత్తాన్ని రసాయనాలతో శుభ్రం చేశారు. నిబంధనల ప్రకారం క్రిమిరహితం చేశారు.

నా కుటుంబ సభ్యులు, మిగిలిన స్టాఫ్ అంతా సురక్షితంగా ఉన్నారు. మాలో ఎలాంటి లక్షణాలు లేవు. ఈరోజు ఉదయం మేమంతా కరోనా టెస్ట్‌లు చేయించుకున్నాం. అందరికీ నెగిటివ్ అని వచ్చింది. అయినప్పటికీ మా చుట్టూ ఉన్న వాళ్ల భద్రతను దృష్టిలో ఉంచుకుని మేమంతా మరో 14 రోజులపాటు స్వయం నిర్బంధంలోకి వెళ్తున్నాం.

ప్రతి ఒక్కరినీ రక్షించాలనే మన నిబద్ధతకు మేం కట్టుబడి ఉంటాం. అధికారులు సూచించిన అన్ని జాగ్రత్తలను కచ్చితంగా మేమంతా పాటిస్తాం. కరోనాతో బాధపడుతోన్న వారిద్దరికీ మంచి చికిత్సను అందిస్తామని, జాగ్రత్తగా చూసుకుంటామని హామీ ఇస్తున్నాను. వారు త్వరలోనే కోలుకుంటారని హామీ ఇస్తున్నాను. ఇది కష్టకాలమే అయినప్పటికీ ఎవరింట్లో వారుంటూ సరైన జాగ్రత్తలు తీసుకుంటే ఈ వైరస్‌ను జయించడంలో ఎలాంటి అనుమానం లేదని నేను భావిస్తున్నాను.