ధోని ఒక సూపర్ స్టార్ అయినా కూడా స్వేచ్ఛగా మాట్లాడొచ్చు..బ్రేవో

క్రికెట్‌లో భారత మాజీ కెప్టెన్ మహేంద్రసింగ్ ధోనీ ఓ సూపర్ స్టార్ అని వెస్టిండీస్ ఆల్‌రౌండర్ డ్వేన్‌ బ్రావో అభిప్రాయపడ్డాడు. ఐపీఎల్‌లో సుదీర్ఘకాలంగా చెన్నై సూపర్ కింగ్స్‌కి డ్వేన్‌బ్రావో ఆడుతుండగా.. ధోనీ కెప్టెన్సీలో చెన్నై ఇప్పటి వరకూ మూడు సార్లు టైటిల్ విజేతగా నిలిచిన విషయం తెలిసిందే. మైదానంలోనే కాకుండా వెలుపల కూడా ధోనీతో సన్నిహితంగా మెలిగే డ్వేన్‌బ్రావో.. ధోనీ గురించి ఆసక్తికరమైన విషయాల్ని తాజాగా వెల్లడించాడు.

జింబాబ్వే మాజీ ఫాస్ట్ బౌలర్ పోమ్మీ మబాంగ్వాతో ఇన్‌స్టాగ్రామ్ లైవ్ సెషన్‌లో మాట్లాడిన డ్వేన్ ‌బ్రావో.. చెన్నై సూపర్ కింగ్స్‌ సక్సెస్‌కి కారణంగా ధోనీ, ఫ్లెమింగ్ అని వెల్లడించాడు. కెప్టెన్‌గా ధోనీ, కోచ్‌గా ప్లెమింగ్.. చెన్నై సూపర్ కింగ్స్ టీమ్‌లో మంచి సరదా వాతావరణం నెలకొల్పారని చెప్పుకొచ్చిన డ్వేన్ బ్రావో.. ఐపీఎల్ సమయంలో ధోనీతో ఎవరైనా.. ఎప్పుడైనా వెళ్లి స్వేచ్ఛగా మాట్లాడొచ్చని వివరించాడు.

‘‘క్రికెట్‌లో ధోనీ ఓ పెద్ద సూపర్ స్టార్. అలానే చెన్నై సూపర్ కింగ్స్ టీమ్‌లో కూడా. క్రికెట్ కాకుండా ధోనీకి వీడియో గేమ్స్‌ ఆడటమంటే చాలా ఇష్టం. ఐపీఎల్ సమయంలో అతని గది తలుపులు ఎప్పుడు తెరిచే ఉంటాయి. టీమ్‌లోని ఎవరైనా.. ఎప్పుడైనా అతనితో వెళ్లి స్వేచ్ఛగా మాట్లాడొచ్చు. క్రికెట్‌లో ఆ స్థాయిలో ఉన్న వ్యక్తి అలా అందరితో సరదాగా, హుందాగా ఉంటాడని ఎవరూ ఊహించరు’’ అని డ్వేన్‌బ్రావో వెల్లడించాడు.