ధోనీ భారీ సిక్స్ తో రోడ్డు ఫై పడిన బంతిని ఇంటికి తీసుకెళ్లిన అభిమాని...వీడియో వైరల్

చెన్నై సూపర్ కింగ్స్, రాజస్థాన్ రాయల్స్ మధ్య జరిగిన మ్యాచ్‌లో పరుగుల వర్షం కురిసింది. ఇరు జట్ల బ్యాట్స్‌మెన్ సిక్సర్ల మోత మోగించడంతో ఈ మ్యాచ్‌లో మొత్తం 33 సిక్సర్లు నమోదయ్యాయి. రాజస్థాన్ 216 రన్స్ చేయగా చెన్నై 200 పరుగులకే పరిమితమై ఓడిపోయింది. ఈ మ్యాచ్‌లో టామ్ కర్రాన్ వేసిన ఆఖరి ఓవర్లో వరుసగా మూడు సిక్సులు బాదిన ధోనీ అభిమానులను అలరించాడు. సూపర్ కింగ్స్ ఓడినా రెండు జట్ల పరుగుల మధ్య అంతరం లేకుండా చూసాడు ధోని.

కర్రాన్ వేసిన స్లో లెంగ్త్ బాల్‌ను ధోనీ లాంగ్ ఆన్ దిశగా బలంగా కొట్టాడు. అది 92 మీటర్ల భారీ సిక్స్ కావడంతోపాటు బంతి గ్రౌండ్ బయట ఉన్న రోడ్డు మీద పడిపోయింది. ఓ వ్యక్తి లక్కీగా ఆ బంతిని తీసుకొని నవ్వుతూ ఇంటికెళ్లిపోయాడు. వరుసగా మూడు సిక్సులు ఇచ్చిన కర్రాన్ ఆఖరి బంతికి సింగిల్ మాత్రమే ఇచ్చాడు. దీంతో రాజస్థాన్ 16 పరుగుల తేడాతో గెలుపొందింది. ఈ మ్యాచ్‌లో ధోనీ 17 బంతుల్లో 29 పరుగులు చేశాడు. ధోనీ బాదిన బంతి రోడ్డు మీద పడిన వీడియోను ఐపీఎల్ ట్విట్టర్ హ్యాండిల్ ద్వారా ట్వీట్ చేశారు. రాజస్థాన్ బ్యాట్స్‌మెన్‌లో సంజూ శాంసన్ 32 బంతుల్లో 74 (1x4, 9x6), స్టీవ్ స్మిత్ 47 బంతుల్లో 69 (4x4, 4x6), జోఫ్రా ఆర్చర్ 8 బంతుల్లో 28 నాటౌట్ (4x6) రాణించారు. చెన్నై తరఫున డుప్లెసిస్ (37 బంతుల్లో 72, 1x4, 7x6) మెరుపులు మెరిపించాడు.