హర్భజన్ సింగ్ ఐపీయల్ కు దూరమయ్యాడు అన్న వ్యాఖ్యలపై స్పందించిన చెన్నై యాజమాన్యం

చెన్నై సూపర్ కింగ్స్ జట్టులో ఇప్పటికే వ్యక్తిగత కారణాలతో స్టార్ ఆటగాడు సురేష్ రైనా తప్పుకున్న విషయం తెలిసిందే..ఇప్పుడు తాజాగా అందుతున్న వార్త చెన్నై ఫాన్స్ ను మరోసారి నిరాశలోకి నెట్టేస్తుంది..అదే చెన్నై స్టార్ స్పిన్నర్ హర్భజన్ సింగ్ ఇంకా చెన్నై జట్టుతో కలవకపోవడం..సెప్టెంబర్ ఒకటిననె యూఏఈ వెళ్లాల్సిన బజ్జి తన ప్రయాణాన్నీ వాయిదా వేసుకున్నాడు..దీనితో హర్భజన్ ఐపీయల్ ఆడటం లేదు అని అభిమానులు భావిస్తున్నారు..

ఐపీఎల్ 2020 సీజన్‌కి హర్భజన్ సింగ్ దూరంగా ఉండబోతున్నాడనే వార్తలపై చెన్నై సూపర్ కింగ్స్ ఫ్రాంఛైజీ అధికారి స్పందించాడు. ‘‘అవును నిజమే.. హర్భజన్ సింగ్ సెప్టెంబరు 1న యూఏఈకి చేరుకోవాల్సి ఉంది. కానీ.. అతను తన ప్రయాణాన్ని వాయిదా వేసుకున్నాడు. హర్భజన్ తన ప్రయాణంపై ఇప్పటి వరకూ చెన్నై సూపర్ కింగ్స్ యాజమాన్యానికి స్పష్టమైన సమాచారం ఇవ్వలేదు. అయితే.. ఐపీఎల్ 2020 నుంచి హర్భజన్ ఇప్పటికే వైదొలిగినట్లు వస్తున్న వార్తల్లో మాత్రం నిజం లేదు’’ అని ఫ్రాంఛైజీ అధికారి ఒకరు తెలిపారు.

కాగా చెన్నై సూపర్ కింగ్స్ ఫాస్ట్ బౌలర్ దీపక్ చాహర్, యువ ఓపెనర్ రుతురాజ్ గైక్వాడ్‌‌తో పాటు టీమ్ స్టాఫ్ మెంబర్స్ 10 మందికి గత శుక్రవారం కరోనా పాజిటివ్‌గా తేలగా.. సోమవారం నిర్వహించిన పరీక్షల్లో అందరికీ నెగటివ్ వచ్చింది. అయినప్పటికీ.. ఈ 13 మందికీ గురువారం మరోసారి పరీక్షలు నిర్వహించనున్నారు. రెండో సారి కూడా నెగటివ్ వస్తే.. శనివారం నుంచి చెన్నై సూపర్ కింగ్స్ టీమ్ ప్రాక్టీస్ మొదలెట్టనుంది.