బ్రేకింగ్ న్యూస్ ..ఐపీయల్ స్పాన్సర్ షిప్ నుంచి తప్పుకున్న చైనీస్ బ్రాండ్ వివో

ఈ ఏడాది ఇండియన్ ప్రీమియర్ లీగ్(ఐపీఎల్​) టైటిల్ స్పాన్సర్​షిప్​ నుంచి చైనాకు చెందిన మొబైల్ తయారీ సంస్థ వివో తప్పుకుంది. గల్వాన్ ఘటన తర్వాత చైనాతో సరిహద్దుల వద్ద ఉద్రిక్తతలు పెరుగుతుండడం భారత్​లో ఆ దేశ ఉత్పత్తులను బహిష్కరించాలన్న డిమాండ్లు పెరుగుతున్నాయి. అలాగే ఐపీఎల్​ టైటిల్ స్పాన్సర్​గా వివోను కొనసాగిస్తామని బీసీసీఐ ఇటీవల ప్రకటించడంతో తీవ్ర నిరసనలు వ్యక్తమయ్యాయి.

ఐపీఎల్​ను బహిష్కరించాలని కూడా కొందరు పిలుపునిచ్చారు. ఈ నేపథ్యంలో వివోనే ఈ ఏడాది స్పాన్సర్​షిప్ నుంచి తప్పుకుంది. ఐపీఎల్ టైటిల్​ స్పాన్సర్​గా ఉండేందుకు బీసీసీఐ​తో వివో ఐదేండ్లకు ఒప్పందాన్ని కుదుర్చుకుంది. ఇందుకోసం 2018 నుంచి ప్రతి ఏడాది రూ.440కోట్లను బీసీసీఐకు వివో చెల్లిస్తున్నది.

ఈ ఏడాది స్పాన్సర్​షిప్ నుంచి వివో తప్పుకున్నా.. 2021, 2022, 2023 సీజన్ల కాంట్రాక్టు ఇంకా మిగిలే ఉంది. దీంతో ఈ ఏడాది ఐపీఎల్ కోసం కొత్త స్పాన్సర్​ను ఎంపిక చేసేందుకు బీసీసీఐ మరో మూడు రోజుల్లో టెండర్లు ఆహ్వానించనుంది. ఈ ఏడాది ఐపీఎల్​ 13 సీజన్ యూఏఈ వేదికగా సెప్టెంబర్ 19 నుంచి నవంబర్ 20వ తేదీ వరకు జరుగనుంది.