మళ్లీ తడబడ్డ చెన్నై సూపర్ కింగ్స్...కోల్‌కతా నైట్‌రైడర్స్‌తో ఓటమి

బుధవారం రాత్రి కోల్‌కతా నైట్‌రైడర్స్‌తో అబుదాబి వేదికగా జరిగిన మ్యాచ్‌లో అలవోకగా గెలిచే మ్యాచ్‌ని 10 పరుగుల తేడాతో చెన్నై ఓడిపోయింది. మ్యాచ్‌లో ఓపెనర్ రాహుల్ త్రిపాఠి (81: 51 బంతుల్లో 8x4, 3x6) హాఫ్ సెంచరీ బాదినా మిడిలార్డర్ ఫెయిలవడంతో కోల్‌కతా టీమ్ 167 పరుగులకే ఆలౌటైంది. అనంతరం ఛేదనలో షేన్ వాట్సన్ (50: 40 బంతుల్లో 6x4, 1x6) అర్ధ శతకం నమోదు చేయడంతో 12 ఓవర్లు ముగిసే సమయానికి చెన్నై 99/1తో అలవోక విజయాన్ని అందుకునేలా కనిపించింది. కానీ టీమ్ స్కోరు 99 వద్ద అంబటి రాయుడు (30: 27 బంతుల్లో 3x4) ఔటవగా తర్వాత ఓవర్‌లోనే వాట్సన్‌ కూడా సునీల్ నరైన్ బౌలింగ్‌లో అవుట్ అయ్యాడు. దాంతో మళ్లీ మ్యాచ్‌లోకి వచ్చిన కోల్‌కతా తెలివిగా బౌలింగ్ చేస్తూ చెన్నైని ఆఖరికి 157/5కే కట్టడి చేసింది. ఆరో మ్యాచ్‌ ఆడిన చెన్నై టీమ్‌కి ఇది నాలుగో ఓటమికాగా ఐదో మ్యాచ్‌ ఆడిన కోల్‌కతాకి ఇది మూడో గెలుపు.

అంబటి రాయుడు ఔట్ తర్వాత క్రీజులోకి వచ్చిన కెప్టెన్ మహేంద్రసింగ్ ధోనీ (11: 12 బంతుల్లో 1x4) మరోసారి విఫలమవగా శామ్ కరన్ (17: 11 బంతుల్లో 1x4, 1x6) దూకుడుగా ఆడే ప్రయత్నంలో ఔటైపోయాడు. ఇక చివరి వరకూ క్రీజులో నిలిచిన కేదార్ జాదవ్ (7 నాటౌట్: 12 బంతుల్లో 1x4) నెమ్మది బ్యాటింగ్‌తో చెన్నై ఓటమికి ప్రత్యక్షంగా కారణమవగా ఆఖరి ఓవర్‌లో రవీంద్ర జడేజా (21 నాటౌట్: 8 బంతుల్లో 3x4, 1x6) హిట్టింగ్ ఆ టీమ్ ఓటమి అంతరాన్ని తగ్గించ గలిగిందంతే. కోల్‌కతా బౌలర్లలో శివమ్ మావి, వరుణ్ చక్రవర్తి, నాగర్‌కోటి, సునీల్ నరైన్, ఆండ్రీ రసెల్ తలో వికెట్ పడగొట్టారు.

మ్యాచ్‌లో అంతకముందు టాస్ గెలిచిన కోల్‌కతా కెప్టెన్ దినేశ్ కార్తీక్ బ్యాటింగ్ ఎంచుకున్నాడు. ఇక సీజన్ ఆరంభం నుంచి విఫలమవుతున్న ఓపెనర్ సునీల్ నరైన్‌ని మిడిలార్డర్‌కి మార్చిన కోల్‌కతా మేనేజ్‌మెంట్ శుభమన్ గిల్ (11: 12 బంతుల్లో 1x4)తో రాహుల్ త్రిపాఠిని ఓపెనర్‌గా పంపింది. అయినప్పటికీ ఆ జట్టుకి మెరుగైన ఓపెనింగ్ భాగస్వామ్యం లభించలేదు. మంచి ఫామ్‌లో ఉన్న గిల్ తక్కువ స్కోరుకే ఔటవగా అనంతరం వచ్చిన నితీశ్ రాణా (9), సునీల్ నరైన్ (17: 9 బంతుల్లో 1x4, 1x6), ఇయాన్ మోర్గాన్ (7), ఆండ్రీ రసెల్ (2) ఇలా వచ్చి అలా వెళ్లిపోయారు. అయినప్పటికీ.. ఒక ఎండ్‌లో నిలకడగా ఆడిన రాహుల్ త్రిపాఠి ఆ జట్టుకి మెరుగైన స్కోరు అందించేలా కనిపించాడు.

కోల్‌కతా స్కోరు 140 వద్ద రాహుల్ త్రిపాఠి ఔటవగా అక్కడి నుంచి కోల్‌కతా కోలుకోలేకపోయింది. బ్యాటింగ్ ఆర్డర్‌లో వెనక్కి వచ్చిన దినేశ్ కార్తీక్ (12: 11 బంతుల్లో 1x4) మరోసారి ఫెయిలవగా ఆఖర్లో పాట్ కమిన్స్ (17 నాటౌట్: 9 బంతుల్లో 1x4, 1x6) ఫర్వాలేదనిపించాడు. దాంతో కోల్‌కతా 167 పరుగులైనా చేయగలిగింది. ఇన్నింగ్స్ చివరి ఓవర్ వేసిన డ్వేన్ బ్రావో ఐదు పరుగులే ఇవ్వగా చివరి మూడు వికెట్లనీ కోల్‌కతా ఆ ఓవర్‌లోనే చేజార్చుకుంది.

మ్యాచ్‌లో తొలుత బ్యాటింగ్ చేసిన కోల్‌కతా తొలి 10 ఓవర్లకి 2 వికెట్లు కోల్పోయి 93 పరుగులు చేయగా ఆ తర్వాత చివరి 10 ఓవర్లలో చేసింది 74 పరుగులే. మరోవైపు ఛేదనలో చెన్నై కూడా తొలి 10 ఓవర్లలో 90/1తో నిలిచింది. కానీ చివరి 60 బంతుల్లో 67 పరుగులు మాత్రమే చేయగలిగింది.