అచ్చెన్నాయుడును అరెస్టు చేసిన తీరుఫై చంద్రబాబు ఆగ్రహం

టీడీఎల్పీ ఉపనేత, మాజీ మంత్రి అచ్చెన్నాయుడును అరెస్టు చేసిన తీరు అత్యంత దారుణంగా ఉందని తెలుగుదేశం పార్టీ అధినేత చంద్రబాబు నాయుడు ఆగ్రహం వ్యక్తం చేశారు. ఇంట్లో నుంచి బలవంతంగా తీసుకొచ్చి అరెస్టు చేయడం సరికాదన్నారు.

అమరావతిలో ఆయన మీడియాతో మాట్లాడుతూ ఒక ప్రజాప్రతినిధి పట్ల ప్రభుత్వం ప్రవర్తించిన తీరు గర్హనీయమన్నారు. ఇటీవలే శస్త్రచికిత్స జరిగిన వ్యక్తిని ఇలా రాష్ట్రమంతా తిప్పడం ఏంటని ప్రశ్నించారు. వైసీపీ నాయకులు అధికారం ఉందని ఉన్మాదుల్లా ప్రవర్తిస్తున్నారని చంద్రబాబు మండిపడ్డారు. ఎన్ని విధాలుగా చేయాలో అన్ని విధాలా అచ్చెన్నాయుడిని అవమానించారని పేర్కొన్నారు. ఇలాంటి దుర్మార్గాలు ఎందుకు చేస్తున్నారో సమాధానం చెప్పాలని డిమాండ్‌ చేశారు.

విజిలెన్స్‌ నివేదికలో అచ్చెన్నాయుడు పేరు ఎక్కడైనా ఉందా అని ప్రశ్నించారు. పర్చేజ్‌‌ మాన్యువల్‌లో మంత్రి పాత్ర ఉందని ఎక్కడా లేదని చంద్రబాబు పేర్కొన్నారు. అవినీతి నిరోధక శాఖ నివేదికను మారుస్తారా అని ప్రశ్నించారు. మైనింగ్‌, భూఅక్రమాలపై పోరాటం వల్లే ఈ వేధింపులా ప్రభుత్వ అవినీతి కార్యకలాపాలపై పోరాటం వల్లే ఈ దాడులా అని వ్యాఖ్యానించారు. మీ దోపిడీని అడ్డుకుంటున్నామనే ఇలాంటివి చేస్తున్నారని పేర్కొన్నారు. ఈ అరాచకాలకు అడ్డూ అదుపు లేకుండా పోయాయి. కల్పిత కథను తీసుకొచ్చి అచ్చెన్నాయుడిపై తప్పుడు కేసులు పెట్టారని చంద్రబాబు ఆగ్రహం వ్యక్తం చేశారు.