అర్ణబ్ కు బెయిల్ నిరాకరించిన బాంబే హైకోర్ట్
By: Sankar Fri, 06 Nov 2020 06:41 AM
రిపబ్లిక్‌ టీవీ ఎడిటర్‌ ఇన్‌ చీఫ్‌ అర్నబ్‌ గోస్వామి పెట్టుకున్న మధ్యంతర బెయిల్ పిటిషన్‌ను గురువారం బాంబే హైకోర్టు తిరస్కరించింది. అరెస్టు అక్రమమనీ, తనపై నమోదైన ఎఫ్‌ఐఆర్‌ను కొట్టివేయాలనీ, ముంబై పోలీసుల దర్యాప్తుపై స్టే విధించాలని బెయిల్ పిటిషన్‌లో అర్నబ్‌ కోరారు.
మహారాష్ట్ర ప్రభుత్వం రాజకీయంగా కక్ష సాధింపునకు పాల్పడుతోందని అర్నబ్‌ తరఫు లాయర్‌ హరీశ్‌ సాల్వే ఆరోపించారు. వాదనలు విన్న బాంబే హైకోర్టు.. వాదనలు వినిపించాలని ప్రతివాదులుగా ఉన్న మహారాష్ట్ర ప్రభుత్వం, అన్వయ్‌ నాయక్ భార్య అక్షతను కోరింది. శుక్రవారం వాదనలు వింటామని తెలిపింది.
కాగా అర్నబ్‌ను అరెస్టు చేయడం ప్రాథమికంగా చట్ట విరుద్ధమని మహారాష్ట్రలోని ఓ న్యాయస్థానం వ్యాఖ్యానించింది. ఇంటీరియర్‌ డిజైనర్‌ అన్వయ్‌ నాయక్, ఆయన తల్లి కుముదిని ఆత్మహత్యకు అర్నబ్‌ కారణమంటూ వచ్చిన 2018 నాటి ఆరోపణలపై బుధవారం ముంబై పోలీసులు అర్నబ్‌ను అరెస్టుచేశారు. అర్నబ్‌తోపాటు అరెస్టు చేసిన ఫిరోజ్‌ షేక్, నితేశ్‌ సర్దాలను పోలీసులు రాయగఢ్‌ జిల్లా అలీబాగ్‌ కోర్టులో బుధవారం రాత్రి హాజరు పరిచారు
