ఓ ఇంటివాడైన దర్శకుడు బక్కియరాజ్ కన్నన్

కార్తి హీరోగా వస్తోన్న ‘సుల్తాన్’ సినిమా దర్శకుడు బక్కియరాజ్ కన్నన్ వివాహం జరిగింది. నిన్న వేలూర్‌లోని సెవూర్‌లో కన్నన్ వివాహం ఆశతో ఘనంగా జరిగింది. ఈ వివాహ వేడుకలో హీరో శివకార్తికేయన్ పాల్గొని నూతన వధూవరులను ఆశీర్వదించారు. శివకార్తికేయన్ సినిమా ‘రెమో’ ద్వారానే బక్కియరాజ్ కన్నన్ దర్శకుడిగా తమిళ చిత్ర పరిశ్రమకు పరిచయమయ్యారు. కన్నన్, ఆశ వివాహ వేడుకలో శివకార్తికేయన్ పాల్గొన్న ఫొటోలు ప్రస్తుతం సోషల్ మీడియాలో వైరల్‌గా మారాయి. ‘సుల్తాన్’ నిర్మాత ఎస్.ఆర్. ప్రభుతో పాటు చిత్ర యూనిట్ పాల్గొని హీరో కార్తి ఫస్ట్ లుక్ పోస్టర్‌ను వివాహ వేదికపై ఆవిష్కరించారు. ఈ విధంగా బక్కియరాజ్ కన్నన్‌కు నిర్మాత ప్రభు సర్‌ప్రైజ్ గిఫ్ట్ ఇచ్చారు.

‘సుల్తాన్’ హీరో కార్తి మాత్రం ఈ వివాహ వేడుకలో పాల్గొనలేదు. కానీ, ట్విట్టర్ ద్వారా కన్నన్‌కు శుభాకాంక్షలు తెలియజేశారు. ‘‘బక్కియరాజ్, ఆశల వివాహ జీవితం గొప్పగా ఉండాలని కోరుకుంటున్నాను. మీ కొత్త ప్రయాణం ఒకరిపై ఒకరికి నమ్మకం, ఒకరినొకరు అర్థం చేసుకోవడం, ప్రేమతో నిండి ఉండాలి. దేవుడి మిమ్మల్ని దీవించాలి’’ అని కార్తి పేర్కొన్నారు. బక్కియరాజ్ కన్నన్ మొదట డైరెక్టర్ అట్లీ వద్ద ‘రాజా రాణి’ సినిమాకు అసోసియేట్‌గా పనిచేశారు. ‘రెమో’తో దర్శకుడిగా మారారు. రెండో సినిమాగా కార్తితో ‘సుల్తాన్’ను రూపొందిస్తున్నారు. రష్మిక మందన హీరోయిన్‌గా నటించిన ఈ చిత్రం విడుదలకు రెడీ అవుతోంది. ఇటీవలే కార్తి డబ్బింగ్ పూర్తిచేశారు. నిన్న విడుదలైన ‘సుల్తాన్’ ఫస్ట్ లుక్‌కు విశేష స్పందన లభించింది. త్వరలోనే విడుదల తేదీని ప్రకటించనున్నారు.