IPL 2020 RCB Vs KKR : చెలరేగిన ఏబీ డివిలియర్స్... ఓ భారీ సిక్స్ రోడ్డుపై వెళ్తున్న కారుని ఢీకొట్టింది...!

ఐపీఎల్ 2020 సీజన్‌లో షార్జా వేదికగా కోల్‌కతా నైట్‌రైడర్స్, రాయల్ ఛాలెంజర్స్ బెంగళూరు మధ్య సోమవారం రాత్రి మ్యాచ్ జరగగా.. ఇన్నింగ్స్ 13వ ఓవర్‌లో క్రీజులోకి వచ్చిన ఏబీ డివిలియర్స్ (73 నాటౌట్: 33 బంతుల్లో 5x4, 6x6) విధ్వంసక రీతిలో చెలరేగిపోయాడు. పిచ్ స్లోగా కనిపించినా.. డివిలియర్స్ హిట్టింగ్ చేసిన తీరు అందర్నీ ఆశ్చర్యపరిచింది.

రాయల్ ఛాలెంజర్స్ బెంగళూరు పవర్ హిట్టర్ ఏబీ డివిలియర్స్ కొట్టిన ఓ భారీ సిక్స్ స్టేడియం వెలుపల రోడ్డుపై వెళ్తున్న కారుకి తగిలింది. ఈ మ్యాచ్‌లో మొదట బ్యాటింగ్ చేసిన బెంగళూరు 2 వికెట్ల నష్టానికి 194 పరుగులు చేయగా.. ఛేదనలో కోల్‌కతా 112/9కే పరిమితమైంది.

ఇన్నింగ్స్ 16వ ఓవర్ వేసిన ఫాస్ట్ బౌలర్ నాగర్‌కోటి బౌలింగ్‌లో బాదుడు మొదలెట్టిన ఏబీ డివిలియర్స్ వరుసగా రెండు బంతుల్ని సిక్సర్ల రూపంలో స్టేడియం వెలుపలికి తరలించేశాడు. ఆ ఓవర్‌లో మూడో బంతిని షార్ట్ లెంగ్త్ రూపంలో నాగర్‌కోటి విసరగా.. మిడ్ వికెట్‌ దిశగా 85 మీటర్లు సిక్స్ బాదిన ఏబీడీ.. తర్వాత బంతిని యార్కర్ రూపంలో సంధించడంతో ఈసారి బంతిని ఏకంగా 86 మీటర్ల దూరం పడేలా హిట్ చేసేశాడు.

ఎక్కువ ఎత్తు గాల్లోకి లేచిన బంతి స్టేడియం వెలుపల రోడ్డుపై వెళ్తున్న కారుని ఢీకొట్టింది. మ్యాచ్‌లో నాగర్‌కోటికే కాదు.. పాట్ కమిన్స్‌కీ 17వ ఓవర్‌లో రెండు సిక్సర్లు బాదిన ఏబీ డివిలియర్స్ ఆ తర్వాత ఆండ్రీ రసెల్‌కీ చుక్కలు చూపించేశాడు. మొత్తంగా.. బ్యాటింగ్‌కి కష్టమైన పిచ్‌పై ఏబీ డివిలియర్స్ కొట్టిన సిక్సర్లు మ్యాచ్‌కే హైలైట్‌గా నిలవగా.. కోల్‌కతా హిట్టర్లు కనీసం స్టాండ్స్‌లోకి కూడా బంతిని కొట్టలేకపోవడం గమనార్హం.

డివిలియర్స్ తరహాలో రసెల్ (16: 10 బంతుల్లో 2x4, 1x6) కూడా సిక్సర్లు కొడతాడని అందరూ ఊహించినా.. అతను ఒక సిక్సర్‌తో సరిపెట్టాడు. అది కూడా ఫ్లాట్ సిక్స్.. బౌండరీ లైన్ వద్ద పడిక్కల్ క్యాచ్ పట్టి బౌండరీ లైన్ తొక్కేయడంతో సిక్స్‌గా వచ్చింది.