డాక్టర్ అయి ఆ తరవాత యాక్టర్ అయిన ఓ హీరోయిన్

సత్యదేవ్ హీరోగా వచ్చిన ‘ఉమామహేశ్వర ఉగ్రరూపస్య’ సినిమాలో హీరోయిన్‌గా నటించిన రూపా కొడువయుర్ సహజ సిద్ధమైన అందం, అభినయంతో కట్టిపడేశారు. అయితే, ఈ నటి అందరిలా కాదు. ఆమె గురించి తెలుసుకోవాల్సిన విషయాలు చాలానే ఉన్నాయి. చాలా మంది డాక్టర్ కాబోయి యాక్టర్ అయ్యాను అని చెబుతుంటారు. కానీ, ఈమె డాక్టర్ అయి ఆ తరవాత యాక్టర్ అయ్యారు. అమ్మ కలను నెరవేర్చడం కోసం డాక్టర్ అయ్యారు. తన కలను సాకారం చేసుకోవడం కోసం యాక్టర్ అయ్యారు. రూప మంచి క్లాసికల్ డాన్సర్. తనకు సొంతంగా ఒక యూట్యూబ్ ఛానెల్ ఉంది. ‘సాహోరే బాహుబలి’ సాంగ్‌కు క్లాసికల్ డాన్స్ పెర్ఫార్మెన్స్ చేసి తన యూట్యూబ్ ఛానెల్‌లో అప్‌లోడ్ చేశారు. ఈ పెర్ఫార్మెన్స్‌తో రూపకు మంచి గుర్తింపు వచ్చింది.

కె.విశ్వనాథ్ సినిమాల్లోని పాటలకు ఆమె చేసిన నృత్యాలకు కూడా మంచి గుర్తింపు వచ్చినట్టు రూప ఓ ఇంటర్వ్యూలో చెప్పారు. రూప జాతీయ స్థాయిలో వెయ్యికి పైగా నృత్య ప్రదర్శనలు చేశారు. ఆమె తల్లి మంగ లక్ష్మి సంస్కృతం లెక్చరర్, తండ్రి రవికుమార్ ఆర్మీలో పనిచేస్తున్నారు. అయితే, రూప డాక్టర్ అయితే చూడాలనేది తల్లి కోరిక. తల్లి కలను సాకారం చేయడం కోసం రూప ఎంతో కష్టపడి చదివారు. ఎంసెట్‌లో ఆమెకు మంచి ర్యాంక్ వచ్చింది. దీంతో గుంటూరులోని కాటూరి మెడికల్ కాలేజీలో ఆమెకు ఫ్రీ సీట్ లభించింది. అయితే, తాను ఎంసెట్‌కు ప్రిపేర్ అయ్యేటప్పుడు తన తల్లికి క్యాన్సర్ వచ్చిందని రూప ఓ ఇంటర్వ్యూలో వెల్లడించారు. దీంతో తాను ఆంకాలజిస్ట్ కావాలని నిర్ణయించుకున్నానని చెప్పారు.

తాను ప్రస్తుతం కరోనా రోగులకు చికిత్స అందిస్తున్నానని, రెండు మాస్కులు, గాగుల్స్, ఫేస్ షీల్డ్, పీపీఈ సూట్ ధరించి పనిచేయడం ఎంత కష్టమో చెప్పారు. అమ్మ కోరిక మేరకు డాక్టర్ అయిన రూప తన కలను నెరవేర్చుకోవడం కోసం యాక్టర్‌ను అయ్యారు. తనకు సుహాసిని, రాధిక సినిమాలంటే ఎంతో ఇష్టమని వాళ్లలా నటించాలని ఉండేదని రూప చెప్పారు. కానీ, సినిమా రంగంలోకి ఎలా ప్రవేశించాలో, ఎవరిని సంప్రదించాలో తనకు తెలియలేదని అన్నారు. అయితే, ‘ఉమామహేశ్వర ఉగ్రరూపస్య’ సినిమాలో నటించడానికి హీరోయిన్ల కోసం మేకర్స్ వెతుకుతున్న విషయం తెలుసుకుని తన ప్రొఫైల్ పంపానని తెలిపారు. డైరెక్టర్ వెంకటేష్ మహా, నిర్మాత ప్రవీణ ఆడిషన్ చేసి తనను ఎంపిక చేశారని తెలిపారు.