నవంబర్ 19న రియల్‌మి నుంచి 5G స్మార్ట్‌ఫోన్ లాంచ్...

రియల్‌మి 7 స్మార్ట్‌ఫోన్ 5G సాంకేతికతతో పనిచేసే ‌గురించి గత కొన్ని రోజులుగా వినియోగదారులు ఎదురు చూస్తున్నారు. ఈ సరికొత్త స్మార్ట్‌ఫోన్‌ను నవంబర్ 19న మార్కెట్లోకి విడుదల చేయనున్నట్లు ఆ సంస్థ అధికారికంగా ప్రకటించింది. రియల్‌మి 7 5G డివైజ్‌ను వర్చువల్ ఈవెంట్ ద్వారా బ్రిటన్‌లో లాంచ్‌ చేయనున్నారు. కరోనా నేపథ్యంలో ఆ సంస్థ గతంలో కూడా వర్చువల్ ఈవెంట్‌లోనే వివిధ ఉత్పత్తులను లాంచ్ చేసింది. రియల్‌మి అధికారిక ట్విట్టర్ అకౌంట్‌ ద్వారా ఈ వివరాలను వెల్లడించారు. ఈ ఫోన్‌ను యూరోపియన్ మార్కెట్లోకి నవంబర్ 19న ఉదయం 10 గంటలకు (భారతదేశంలో 3:30 PM) విడుదల చేస్తామని పోస్ట్ చేశారు. ఆ సంస్థ నుంచి ఇప్పటికే రియల్‌మి 7, 7 ప్రో, 7 ఐ మోడళ్లు మార్కెట్లోకి వచ్చాయి. తాజా ఫోన్‌కు 5G సపోర్ట్ ఉంటుంది. అభిమానులు, వినియోగదారులు ట్విట్టర్, ఫేస్‌బుక్, సంస్థ అధికారిక యూట్యూబ్ ఛానెల్ వంటి ప్లాట్‌ఫామ్‌లలో ఈవెంట్‌ను ప్రత్యక్ష ప్రసారం ద్వారా చూడవచ్చని రియల్‌మి ప్రకటించింది.

ఫీచర్లు...

రియల్‌మి 7 సిరీస్‌లో వచ్చిన ఇతర స్మార్ట్‌ఫోన్‌ల మాదిరిగానే తాజా రియల్‌మి 7 5G ఫీచర్లు ఉంటాయని మార్కెట్ వర్గాలు భావిస్తున్నాయి.

5G సపోర్ట్, 90 హెర్ట్జ్ రిఫ్రెష్‌ రేట్‌తో 6.5 అంగుళాల డిస్‌ప్లే, 16 మెగాపిక్సెల్ సెల్ఫీ కెమెరాతో పంచ్ హోల్ డిజైన్‌ వంటి ఫీచర్లు ఈ స్మార్ట్‌ఫోన్‌ సొంతం.

కెమెరా విభాగంలో 48MP ప్రైమరీ, 8MP సెకండరీ కెమెరా, రెండు 2MP కెమెరాలతో క్వాడ్-కోర్ సెటప్ ఉంది.

ఆక్టాకోర్ మీడియాటెక్ డైమెన్సిటీ 720 చిప్‌సెట్ ప్రాసెసర్, 30W ఫాస్ట్ ఛార్జింగ్ సపోర్ట్, 5,000 mAh బ్యాటరీ సామర్థ్యంతో రియల్‌మి 7 5Gను రూపొందించారు.


ఇండియాలో వేరే పేరుతో..


భారతదేశంలో రియల్‌మి 7 5G స్మార్ట్‌ఫోన్‌ను రియల్‌మి V5 పేరుతో విడుదల చేయనున్నట్లు కొన్ని నివేదికలు ప్రకటించాయి. RMX2111 మోడల్ నంబర్ ఉన్న ఈ స్మార్ట్‌ఫోన్‌ గురించి తాజా వివరాలను NBTC వెబ్‌సైట్‌ ప్రచురించింది. గతంలో ఇదే మోడల్ నంబర్‌ను రియల్‌మి V5కు చెందినదిగా గుర్తించారు. దీంతో ఇది రెండు వేర్వేరు బ్రాండింగ్‌లతో వస్తున్న ఒకే స్మార్ట్‌ఫోన్‌ అని మార్కెట్ వర్గాలు భావిస్తున్నాయి. రియల్‌మి 7 5జీ వేరియంట్‌ను భారత మార్కెట్లోకి తీసుకొచ్చే అంశంపై అధికారిక సమాచారం లేదు. భారత్‌లో విడుదలైతే, ఇది దేశంలో 5జీ స్మార్ట్‌ఫోన్ రంగాన్ని మార్చగలదని ఆయా సంస్థలు అభిప్రాయం.