తెలంగాణ రాష్ట్ర రాజకీయాల్లో ప్రకంపనలు సృష్టించిన జీవో నెం. 111పై సినిమా

ఈ మధ్యకాలంలో వాస్తవ ఘటనల ఆధారంగా తెరకెక్కుతున్న సినిమాల సంఖ్య పెరుగుతూ వస్తోంది. జనం కూడా ఇలాంటి సినిమాల్ని చూసేందుకు ఆసక్తి చూపిస్తున్నారు. దేశ వ్యాప్తంగా సంచలనం రేపిన హత్యలు, ఆత్మహత్యలు, నేరాలు నుంచి వివిధ ప్రభుత్వాల హయాంలో జరిగిన కుంభకోణాలు, విప్లవాత్మక మార్పులపై కూడా సినిమాలు నిర్మిస్తున్నారు. కొన్ని సినిమాల్లో వాటికి సంబంధించిన డైలాగులు, సీన్లు జత చేస్తున్నారు. అయితే తాజాగా తెలంగాణ రాష్ట్ర రాజకీయాల్లో ప్రకంపనలు సృష్టించిన జీవో నెం. 111పై సినిమా వస్తోంది. జీవో 111 ఈ పేరు వింటేనే చాలామంది హడలిపోతారు. ఎందుకంటే ఇటీవల తెలంగాణ రాష్ట్ర రాజకీయాల్లో ప్రకంపనలు సృష్టించి అన్ని వర్గాల్లో భయాందోళనలను రేకెత్తించిన జీవో ఏదైనా ఉందంటే అది 111. ఈ రాజకీయ రాక్షస క్రీడలో వ్యవసాయ రైతులు బలవుతున్నారు. జీవోలను అడ్డుపెట్టుకుని నాయకులు, వారి తొత్తులు చేసే దురాగతాలపై ఓ యువకుని తిరుగుబాటు ఫలితమే ఈ ‘111’ చిత్రం.

సజీవమైన వాస్తవ కథ. ప్రభుత్వ జీవోలు ఏవైనా ప్రజల మెరుగైన జీవన విధానానికి బలమైన ఆయుధాలవ్వాలని చెప్పే ప్రయత్నంతో తెరకెక్కుతున్న చిత్రమిది. హైదరాబాద్ శివారులో జీవో 111 పరిధిలో ఉన్న ఓ పల్లెటూరి నేపథ్యంలో ఈ 111 సినిమా ఉంటుంది. సురేష్ కొండేటి సమర్పణలో వై. రఘునాథరెడ్డి, స్నేహలత ఈ సినిమాని నిర్మిస్తున్నారు విక్రమార్కుడు లాంటి పెద్ద పెద్ద సినిమాలకు సినిమాటోగ్రఫీ అందించిన సర్వేస్ మురారి ఈ 111 సినిమాకి డీవోపీ, కమల్ హాసన్ బ్యానర్లో పనిచేసి తమిళ చిత్రసీమలో ఎంతో మంచి పేరు సంపాదించుకున్న లెండర్ లీ మార్టి సంగీతం అందిస్తున్నారు. తెలుగు సినిమా పరిశ్రమలో తనకంటూ ఓ ప్రత్యేక స్థానం సంపాదించుకున్న చంద్రబోస్ పాటలు రాస్తున్నారు. నందమూరి హరి ఎడిటర్. మంచి మేకింగ్ విలువలు, మంచి నటులు, విప్లవాత్మక కథ తో ఈ చిత్రం తెరకెక్కుతోంది. చిత్ర నిర్మాతలు మాట్లాడుతూ ఈ సినిమా మంచి తారాగణంతో రూపొందుతోందని, త్వరలోనే పూర్తి వివరాలు తెలియజేస్తామని చెప్పారు.