సుశాంత్ ..ధోని పాత్ర వెనుక 150 రోజుల కష్టం ఉంది

భారత మాజీ కెప్టెన్ మహేంద్రసింగ్‌ ధోనీ పాత్రని వెండితెరపై అద్భుతంగా పండించిన బాలీవుడ్ హీరో సుశాంత్ సింగ్ రాజ్‌పుత్ ఈరోజు ఆత్మహత్య చేసుకోవడం అందర్నీ కలచివేస్తోంది. 2016, సెప్టెంబరు 30న విడుదలైన ‘ఎం.ఎస్.ధోనీ: ది అన్‌టోల్డ్ స్టోరీ’ సినిమాలో ధోనీ పాత్ర పోషించిన సుశాంత్.. ధోనీ బ్యాటింగ్ స్టయిల్, మేనరిజాన్ని అచ్చుగుద్దినట్లు దింపేశాడు. దాంతో.. ఆ సినిమా సూపర్ హిట్‌కాగా.. సుశాంత్ పేరు ఇండస్ట్రీలో మార్మోగిపోయింది. కానీ.. ధోనీ సినిమా కోసం అతని పడిన క్రికెట్ కష్టాలు మాత్రమే అతి కొద్ది మందికి మాత్రమే తెలుసు.

ఎం.ఎస్.ధోనీ: ది అన్‌టోల్డ్ స్టోరీ’ సినిమా డైరెక్టర్‌ నీరజ్ పాండే.. తొలుత ధోనీ పాత్ర కోసం చాలా మంది యువ నటుల్ని పరిశీలించాడు. కొంత మంది నీరజ్‌కి నచ్చలేదు.. మరికొందర్ని మహేంద్రసింగ్ ధోనీ రిజెక్ట్ చేశాడు. కానీ.. సుశాంత్ సింగ్ రాజ్‌పుత్‌ని మాత్రం ఇద్దరూ ఓకే చేశారు. దాంతో.. ధోనీతో కలిసి కొన్ని రోజులు ట్రావెల్ చేసిన సుశాంత్.. అతని మేనరిజాన్ని దగ్గర నుంచి పరిశీలించాడు. ఆ తర్వాత క్రికెట్‌కి సంబంధించిన మెలకువల్ని భారత మాజీ క్రికెటర్ కిరణ్ మోరే నుంచి నెట్స్‌లో నేర్చుకున్నాడు. మధ్య మధ్యలో ధోనీ ఇంటికి వెళ్లి మరీ సుశాంత్.. ధోనీలా ఆడటాన్ని, హావభావాల్ని ప్రదర్శించడంపై పట్టు సాధించాడు.

ఎం.ఎస్.ధోనీ: ది అన్‌టోల్డ్ స్టోరీ’ సినిమా షూటింగ్‌లో ఒకవైపు పాల్గొంటూనే మరోవైపు ధోనీలా నెట్స్‌లో సుశాంత్ సింగ్ రాజ్‌పుత్ ప్రాక్టీస్ చేశాడు. తొలినాళ్లలో కనీసం బంతిని కూడా టచ్ చేయలేకపోయిన సుశాంత్.. ఆ తర్వాత నెమ్మదిగా బంతిని బ్యాట్‌కి మిడిల్ చేస్తూ.. చివర్లో హెలికాప్టర్ షాట్స్‌ని ప్రాక్టీస్ చేసినట్లు తెలుస్తోంది. ఈ క్రమంలో ఎన్నోసార్లు అతనికి గాయాలయ్యాయి. క్లిష్టమైన హెలికాప్టర్ షాట్‌ని ప్రాక్టీస్ చేసే సమయంలో అతని పక్కటెముకలు ఓసారి పట్టేశాయి. ఇలా దాదాపు 150 రోజుల పాటు సుశాంత్ నెట్స్‌లో శ్రమించినట్లు తెలుస్తోంది. అతని కష్టం వెండితెరపై కనిపించింది.