‘రాంగ్ గోపాల్ వర్మ’ టైటిల్ సాంగ్ విడుదల..

రామ్ గోపాల్ వర్మకు వ్యతిరేకంగా వరసపెట్టి సినిమాలు తీస్తున్నారు. తాజాగా జర్నలిస్ట్ ప్రభు దర్శకత్వంలో ఓ సినిమా రూపుదిద్దుకుంటోంది. దీనికి ‘రాంగ్ గోపాల్‌వర్మ’ అని టైటిల్ పెట్టారు. కమెడియన్ షకలక శంకర్ టైటిల్ రోల్ పోషిస్తున్న ఈ చిత్రం టైటిల్ లోగోను సామాజిక కార్యకర్త, మహిళాభ్యుదయవాది దేవి విడుదల చేయగా, పోస్టర్‌ను మరో మహిళాభ్యుదయవాది సంధ్య విడుదల చేశారు. ఇదిలా ఉంటే, ఈ చిత్రంలోని టైటిల్ సాంగ్‌ను ప్రముఖ దర్శక నిర్మాత తమ్మారెడ్డి భరద్వాజ, మరో నిర్మాత కె.ఎల్.దామోదర్ ప్రసాద్ సంయుక్తంగా ఆవిష్కరించారు. ప్రముఖ మ్యూజిక్ కంపెనీ మధుర ఆడియో ద్వారా ఈ పాటను విడుదల చేశారు. యువ సంగీత దర్శకుడు ర్యాప్ రాక్ షకీల్ ఈ చిత్రానికి సంగీత సారధ్యం వహిస్తున్నారు. ఆయనే ఈ టైటిల్ సాంగ్‌ను పాడారు. ఈ పాటను దర్శక నిర్మాత జర్నలిస్ట్ ప్రభు రాశారు.

పవన్ కళ్యాణ్ పుట్టినరోజు నాడు విడుదల చేసిన ఈ పాటను మెగా అభిమానులు, పవన్ కళ్యాణ్ ఫ్యాన్స్‌కు ప్రభు అంకితం ఇచ్చారు. సినిమా పాత్రికేయుడిగా సుదీర్ఘమైన అనుభవం కలిగి అందరికీ తలలో నాలుకలా ఉండే ప్రభు.. ఎంతో ఆవేదనతో, ధర్మాగ్రహంతో, ఒక ప్రత్యేకమైన ప్రయోజనాన్ని ఆశించి తెరకెక్కించిన ఈ చిత్రం అందరికీ చేరువ కావాలని కోరుకుంటున్నట్లు తమ్మారెడ్డి-దామోదర్ ప్రసాద్ వెల్లడించారు. కాగా, తాను రాసిన ‘వర్మ వర్మ వర్మ... ఓ రాంగ్ గోపాల్ వర్మ... ఇలా కాలిందేమిటయ్య నీ ఖర్మ’ అనే పాటను తనకు అత్యంత ఆత్మీయులైన తమ్మారెడ్డి భరద్వాజ, కె.ఎల్.దామోదర్ ప్రసాద్ చేతుల మీదుగా విడుదల చేయడం సంతోషంగా ఉందని ప్రభు అన్నారు.

ర్యాప్ రాక్ షకీల్ మంచి ట్యూన్ ఇవ్వడంతో పాటు తన గానంతో పాటను రక్తి కట్టించాడని ప్రభు తెలిపారు. ఈ పాటను మెగాభిమానులకు, ముఖ్యంగా పవన్ కళ్యాణ్ ఫ్యాన్స్‌కు అంకితం చేస్తున్నానని, అందుకే పవన్ పుట్టినరోజున ఈ పాటను విడుదల చేశానని అన్నారు. ప్రభు మాట్లాడుతూ .. పవన్ పుట్టినరోజు ఏర్పాట్లు చేస్తూ విద్యుత్ షాక్‌కు గురై మరణించిన ముగ్గురు అభిమానులకు ఈ సందర్భంగా సంతాపం తెలిపారు. ఈ చిత్రం ద్వారా వచ్చే ఆదాయంలో పావు వంతు ఆ ముగ్గురు ఫ్యాన్స్ కుటుంబాలకు అందిస్తామని ప్రకటించారు.