నా అభిమాన నటుడు రవితేజ ..పాయల్ రాజపుత్

RX 100 సినిమాతో టాలీవుడ్‌కు పరిచయమైన హీరోయిన్ పాయల్ రాజ్‌పుత్.. తొలి సినిమాతోనే ఆకట్టుకున్నారు. ఈ ఒక్క సినిమాతోనే ఆమె పాపులర్ అయిపోయారు. పాయల్ రాజ్‌పుత్‌ అంటే అందం మాత్రమే కాదు ప్రతిభావంతురాలైన నటి కూడా. ఏ క్యారెక్టర్‌లోనైనా ఆమె ఒదిగిపోగలదు. ఆమె ఇప్పటి వరకు చేసిన పాత్రలన్నీ అలాంటివే. కాకపోతే, RX 100 సినిమా తరవాత ఆమె చేసిన చిత్రాలు అంతలా ఆడలేదు తాజాగా పాయల్ రాజ్‌పుత్ ఒక ఇంటర్వ్యూ లో మాట్లాడారు. ఈ ఇంటర్వ్యూలో ఆమె పలు ఆసక్తికర విషయాలను పంచుకున్నారు.

మాస్ మహారాజా రవితేజ అంటే తనకు చాలా ఇష్టమని చెప్పారు. టాలీవుడ్‌లో రవితేజ, ప్రభాస్ తన ఫేవరేట్ హీరోలని వెల్లడించారు. ఫేవరేట్ హీరోయిన్ తమన్నా అని పేర్కొన్నారు. అయితే, తనకు ప్రభాస్, విజయ్ దేవరకొండ చిత్రాల్లో నటించాలన్నది కల అని చెప్పారు పాయల్. త్వరలోనే తన కల నెరవేరుతుందని ఆశిస్తున్నట్టు తెలిపారు. అలాగే, దర్శకులు సందీప్ రెడ్డి వంగ, తేజతో పనిచేయాలని ఉందని పాయల్ అన్నారు. RX 100 డైరెక్టర్ అజయ్ భూపతితో కూడా మరోసారి పనిచేయాలని ఉందన్నారు.

ఇక తన కెరీర్ గురించి మాట్లాడుతూ.. మోడలింగ్ నేర్చుకున్న తరవాత ఢిల్లీ నుంచి ముంబై వెళ్లానని, అక్కడికి వెళ్లిన కొన్ని రోజులకే హిందీ సీరియ‌ల్‌లో అవకాశం వచ్చిందని పాయల్ చెప్పారు. సీరియల్స్ నటిస్తోన్న సమయంలోనే పంజాబీ, తెలుగు సినిమా అవకాశాలు వచ్చాయన్నారు. RX 100 సినిమా తన జీవితంలో సంభవించిన ఒక మంచి విషయం అని అన్నారు. ఆ సినిమా అంటే తనకు ఎంతో ఇష్టమని, ఎప్పటికీ ఆ సినిమాను తాను మరిచిపోనని చెప్పారు. తెలుగు సినిమాలో RX 100 తనకు ఒక గుర్తింపును ఇచ్చిందని తెలిపారు.