‘రోరి’ అనే చిత్రంలో తెలంగాణ సీఎం పాత్ర పోషించిన "కోట శ్రీనివాస‌రావు"

విల‌క్షణ న‌టుడు కోట శ్రీనివాస‌రావు ఎలాంటి పాత్ర అయినా ఆయనకు కొట్టిన పిండే. కేవలం తెలుగులో మాత్రమే కాకుండా పరభాషా చిత్రాలోనూ నటించి మెప్పించిన దిగ్గజ నటుడాయన. గ‌తంలో పలు చిత్రాల్లో ఆయన ముఖ్యమంత్రి పాత్రలో క‌నిపించారు. అలాగే, ప్రతిపక్ష నేత పాత్రల్లోనూ నటించారు.

అయితే, కొత్త రాష్ట్రమైన తెలంగాణకు ఆయన ముఖ్యమంత్రిగా న‌టించ‌డం విశేషం. ‘రోరి’ అనే చిత్రంలో కోట తెలంగాణ సీఎం పాత్ర పోషించారు. శుక్రవారం కోట శ్రీనివాస‌రావు పుట్టిన‌రోజును పురష్కరించుకుని ఆయన లుక్‌ను ‘రోరి’ చిత్ర యూనిట్ విడుద‌ల చేసింది. ఈ చిత్రంలో ఆయ‌న చాలా సెన్సిటివ్ ముఖ్యమంత్రిగా వైవిధ్యమైన పాత్రలో న‌టిస్తున్నారని చిత్ర యూనిట్ వెల్లడించింది. ఈ పాత్ర పేరు ఆర్‌. రామ‌న్న చౌద‌రి.

ఈ చిత్రాన్ని సీటీఎస్‌ స్టూడియోస్‌, ఎస్‌టీవీ ఎంటర్‌టైన్మెంట్స్‌ బ్యానర్లపై చరణ్‌ రోరి నిర్మిస్తున్నారు. ఆయనే దర్శకత్వం వహిస్తున్నారు. ఈ చిత్రం ఫస్ట్ లుక్‌ని ఇటీవ‌లే విడుద‌ల చేశారు. ఈ చిత్రానికి భీన్స్ సంగీతం సమకూరుస్తున్నారు. ఇదిలా ఉంటే, 650కు పైగా సినిమాల్లో నటించిన కోట శ్రీనివాసరావు ‘ప్రాణం ఖరీదు’ చిత్రంతో పరిచయమయ్యారు. హాస్యనటుడిగా, క్యారెక్టర్ ఆర్టిస్టుగా, విలన్‌గా తెలుగు సినీ పరిశ్రమలో తనకంటూ ఒక అధ్యాయాన్ని లిఖించుకున్నారు.

ప్రస్తుతం ఆయన వయోభారంతో బాధపడుతున్నారు. అందుకే, పాత్రలను ఆచితూచి ఎంపిక చేసుకుంటున్నారు. కిందటేడాది ‘మహర్షి’, ‘ఏబీసీడీ: అమెరికన్ బోర్న్ కన్ఫ్యూజ్డ్ దేశి’ చిత్రాల్లో కనిపించారు. ఇప్పుడు ‘రోరి’ చిత్రంలో ఆయన నటిస్తున్నారు.