సినిమా హాళ్లు తెరవడానికి ఇంకా సమయం ఉంది ..కేంద్ర మంత్రి జవదేకర్

కరోనా కారణంగా లాక్ డౌన్ విధించడంతో దేశంలోని అన్ని రంగాలు దాదాపు రెండు నెలల పాటు మూత పడ్డాయి..అయితే కేంద్రము దశల వారిగా లాక్ డౌన్ లో సడలింపులు ఇస్తుండటంతో ఒకదాని తర్వాత ఒకటి మళ్ళీ తమ పనులను ప్రారంబిస్తున్నాయి..అయితే సినిమా హాళ్లకు మాత్రం ఇంకా పెర్మిషన్స్ రాలేదు
అయితే కొవిడ్‌-19, లాక్‌డౌన్ ప్రభావంతో సినీ రంగం ఎదుర్కొంటున్న సమస్యల గురించి చిత్ర నిర్మాతలు, ఎగ్జిబిటర్లు తదితర సంఘాలు ప్రభుత్వానికి వినతి పత్రాలు సమర్పించాయి. ఈ అంశంపై మంత్రి జవదేకర్‌ మంగళవారం (జూన్ 2) ఆయా సంఘాల ప్రతినిధులతో వీడియో కాన్ఫరెన్స్ ద్వారా మాట్లాడారు. ఈ సందర్భంగా సినిమా హాళ్లను తెరవాలన్న విజ్ఞప్తిపై ఆయన స్పందించారు.

దేశంలోని 9,500 సినిమా హాళ్లలో కేవలం టికెట్ల అమ్మకం ద్వారానే రోజుకు రూ.30 కోట్లకు పైగా ఆదాయం వస్తుందని మంత్రి జవదేకర్ తెలిపారు. లాక్‌డౌన్‌తో భారీగా సష్టపోయినప్పటికీ ప్రభుత్వ నిర్ణయంపై సినీ రంగం సంఘీభావంగా ఉండటాన్ని ఆయన ప్రశంసించారు.

వేతనాల్లో సబ్సిడీలు, రుణాలపై మూడేళ్ల పాటు వడ్డీ మాఫీ, ట్యాక్స్‌లు, సుంకాల మినహాయింపు, విద్యుత్‌ బిల్లుల కనీస డిమాండు ఛార్జీల మాఫీ తదితర డిమాండ్లను సినీ సంఘాల ప్రతినిధులు కేంద్ర మంత్రి దృష్టికి తీసుకెళ్లారు. అయితే.. ఆ డిమాండ్లను నెరవేర్చేందుకు ప్రభుత్వంపై అధిక భారం పడుతుందని మంత్రి వివరించారు. వారి డిమాండ్లను సంబంధిత శాఖల దృష్టికి తీసుకెళ్తానని హామీ ఇచ్చారు.

సినిమా నిర్మాణ పనుల పున: ప్రారంభించటంపై అడిగిన ప్రశ్నకు మంత్రి జవదేకర్‌ బదులిస్తూ.. మరి కొన్ని రోజులు ఆగాల్సిందేని తెలిపారు. అందుకు సంబంధించిన మార్గదర్శకాలను ప్రభుత్వం ఇప్పటికే జారీ చేసిందని గుర్తు చేశారు. కరోనా అన్‌లాక్‌-1కు సంబంధించి హోం శాఖ ఇటీవల ప్రకటించిన మార్గదర్శకాల్లో.. ప్రార్థనా స్థలాలు, దేవాలయాలు, హోటళ్లు, రెస్టారెంట్లు తదితరాలు తెరిచేందుకు అనుమతి ఇచ్చారు. జూన్ 8 నుంచి షాపింగ్‌ మాల్స్‌ తెరుచుకోవచ్చునని స్పష్టం చేశారు. సినిమా హాళ్లు, స్విమ్మింగ్ పూల్స్, ఎంటర్‌టైన్‌మెంట్‌ పార్కులు, బార్లు, పబ్బులు లాంటివి తదుపరి ఆదేశాలు ఇచ్చేంతవరకు మూసే ఉంచాలని ప్రభుత్వం స్పష్టం చేసింది.