మొదటి భాగానికి రెండింతలు ఎంటర్‌టైనింగ్‌గా ఉండేలా ‘జెంటిల్‌మేన్ 2’

డేరింగ్ నిర్మాత కె.టి.కుంజుమోన్ కథా బలం ఉన్న చిత్రాలను బిగ్ స్కేల్‌లో నిర్మించి భారీ బ్లాక్ బస్టర్స్ అందించిన నిర్మాత. ఫేమస్ డైరెక్టర్ శంకర్‌ దర్శకత్వం వ‌హించిన మొద‌టి సినిమా ‘జెంటిల్‌మేన్’‌ను కుంజుమోన్. తమిళం, తెలుగు భాషల్లో రూపొందిన ఈ సినిమా హీరో అర్జున్‌ కెరీర్‌లో మైలురాయిగా నిలిచింది. విద్యా వ్యవస్థలోని లోపాలపై పోరాడే ఓ యువకుడి కథతో తెరకెక్కిన ఈ చిత్రం భారీ విజయంతో పాటు పలు అవార్డులను కూడా అందుకుంది. అప్పటికే శ‌ర‌త్‌కుమార్ హీరోగా ‘వ‌సంత‌కాల ప‌ర‌వై’, ‘సూరీయ‌న్’ వంటి బిగ్ బ‌డ్జెట్ మూవీస్ నిర్మించిన కె.టి.కుంజుమోన్. 1993లో శంకర్‌ని ద‌ర్శకుడిగా ప‌రిచ‌యం చేస్తూ యాక్షన్ కింగ్ అర్జున్ హీరోగా ‘జెంటిల్‌మేన్’ చిత్రాన్ని నిర్మించారు. సంగీత ద‌ర్శకుడు ఎ.ఆర్.రెహమాన్ స్వర‌ప‌రిచిన ఈ మూవీలోని అన్ని పాట‌లు ఇన్‌స్టెంట్ హిట్‌గా నిలిచి దేశ న‌లుమూల‌ల‌కి వినిపించాయి.

స్టార్ కొరియోగ్రాఫర్ ప్రభుదేవాను హీరోగా పరిచయం చేస్తూ కె.టి.కుంజుమోన్ నిర్మించిన ‘కాదలన్’ (ప్రేమికుడు) సంచలన విజయం సాధించింది. అక్కినేని నాగార్జునతో తమిళ, తెలుగు భాషల్లో భారీ బడ్జెట్ మూవీ ‘రక్షకుడు’ నిర్మించి సంచలనం సృష్టించారు కుంజుమోహన్. మలయాళం స్టార్ హీరోలు మమ్ముట్టి, మోహన్‌లాల్‌‌తో కూడా కుంజుమోన్ చిత్రాలు నిర్మించారు. సూపర్ స్టార్ రజినీకాంత్, యూనివర్సల్ హీరో కమల్ హాసన్‌ల ఎన్నో చిత్రాలతో పాటు కొన్ని వందల చిత్రాలను తమిళనాడు, కేరళ, మహారాష్ట్రలలో డిస్ట్రిబ్యూట్ చేశారు. తను నిర్మించే చిత్రాలనే కాకుండా డిస్ట్రిబ్యూట్ చేసే చిత్రాలకు కూడా భారీ స్థాయిలో పబ్లిసిటీ చేసి తన ప్రత్యేకతను చాటుకునేవారు కె.టి. కుంజుమోన్.

మొదటి భాగానికి రెండింతలు ఎంటర్‌టైనింగ్‌గా ఉండేలా ‘జెంటిల్‌మేన్ 2’ చిత్రాన్ని నిర్మిస్తున్నట్లు తెలిపారు నిర్మాత కె.టి.కుంజుమోన్. సినిమాను ప్రకటించిన సంద‌ర్భంగా కుంజుమోన్ మాట్లాడుతూ.. ‘‘జెంటిల్‌మేన్ మూవీ తమిళ‌, తెలుగు భాష‌ల‌లో విడుద‌లై భారీ విజ‌యాన్ని సొంతం చేసుకుంది. ప్రపంచ వ్యాప్తంగా ఎన్నో దేశాల్లో అనువాదమై అన్ని దేశాల ప్రేక్షకుల‌ నుండి మంచి రెస్పాన్స్ రాబ‌ట్టుకుంది. అయితే, మ‌రోసారి అంద‌రి అంచ‌నాల‌ను అందుకునేలా రెండింత‌లు గొప్పద‌నంతో ‘జెంటిల్‌మేన్ 2’ తెర‌కెక్కిస్తున్నాం. అత్యాధునిక సాంకేతిక ప‌రిజ్ఞానంతో హాలీవుడ్ చిత్రాల‌కు ధీటుగా లేటెస్ట్ ప్రొడక్షన్ టెక్నిక్స్‌తో ఈ చిత్రాన్ని రూపొందిస్తున్నాం’’ అని అన్నారు. ఈ చిత్రాన్ని త‌మిళ‌, తెలుగు, హిందీ, మలయాళ, కన్నడ ఐదు భాష‌ల‌లో పాన్ ఇండియా మూవీగా నిర్మిస్తున్నారు. ఈ చిత్రానికి పనిచేయనున్న న‌టీన‌టులు, సాంకేతిక నిపుణుల వివ‌రాలు త్వర‌లోనే ప్రకటించనున్నారు.