బీజేపీ గూటికి యాంకర్, బిగ్ బాస్ ఫేమ్ కత్తి కార్తీక.. కిషన్ రెడ్డితో భేటీ..!
By: Anji Sat, 21 Nov 2020 10:30 PM
న్యూస్ ఛానల్ యాంకర్, బిగ్ బాస్ ఫేమ్ కత్తి కార్తీక త్వరలో బీజేపీలో చేరే అవకాశాలు మెండుగా ఉన్నాయి. శనివారం ఆమె తాజాగా కేంద్ర హోంశాఖ సహాయమంత్రి కిషన్ రెడ్డితో భేటీ అయ్యారు.
చర్చల అనంతరం బీజేపీలో చేరుతున్నట్లు నిర్ణయం తీసుకున్నారు. ఈ మేరకు ఆమె తన ఫేస్‌బుక్ పేజీలో ఈ విషయాన్ని ప్రకటించారు. తాను కిషన్ రెడ్డిని మర్యాద పూర్వకంగా కలిశానని.. రెండు, మూడు రోజుల్లో పార్టీ మార్పుపై తన నిర్ణయాన్ని ప్రకటిస్తానని వెల్లడించారు.
ఇటీవల జరిగిన దుబ్బాక ఉప ఎన్నికల్లో ఆల్ ఇండియా ఫార్వర్డ్ బ్లాక్ పార్టీ నుంచి కత్తి కార్తీక పోటీ చేసిన సంగతి తెలిసిందే. అధికార పార్టీ నేతలు తనను అనేక విధాలుగా అడ్డుకోవడానికి ప్రయత్నించారని ఆరోపణలు గుప్పించారు.
ప్రశ్నించే గొంతుకగా ప్రజల్లో నిలవాలన్నదే తన ఆశని తన ప్రచారంలో పేర్కొన్నారు. ఈ ఉపఎన్నికల్లో ఆమె 630 ఓట్లు మాత్రమే సాధించి డిపాజిట్లు కోల్పోయారు.
శనివారం ఆమె కేంద్ర హోంశాఖ సహాయమంత్రి కిషన్ రెడ్డితో భేటీ అయి చర్చలు జరిపిన అనంతరం కార్తీక పార్టీ మార్పుపై నిర్ణయం తీసుకున్నట్టు సమాచారం. తాను కిషన్ రెడ్డిని మర్యాద పూర్వకంగా కలిశానని వెల్లడించారు.
