Bumper Offer: పాత బంగారం ఇచ్చి కొత్త బంగారం తీసుకెళ్లొచ్చు..!

బులియన్ రిఫైనర్ ఎంఎంటీసీ-పీఏఎంపీ తాజాగా కొత్త స్కీమ్‌ను తీసుకువచ్చింది. గోల్డ్ బైబ్యాక్ ప్లాన్‌లో విక్రయదారులు వారి బంగారానికి వచ్చే డబ్బులను బ్యాంక్ అకౌంట్‌లోకి పొందొచ్చు. లేదంటే డబ్బులు వద్దనుకుంటే బంగారు కడ్డీలను డెలివరీ తీసుకోవచ్చు. ‘ప్రపంచవ్యాప్తంగా ప్రస్తుతం చాలా ప్రతికూల పరిస్థితులు నెలకొన్నాయి.

ఆర్థిక ఇబ్బందులు ఎదుర్కోవడానికి చాలా మంది బంగారం విక్రయిస్తున్నారు. నామమాత్రపు ట్రాన్సాక్షన్ ఫీజుతో విక్రయదారులు వారి బంగారం డబ్బులను నేరుగా బ్యాంక్ అకౌంట్‌లోకి పొందొచ్చు. లేదంటే గోల్డ్ బార్స్ రూపంలో తీసుకోవచ్చు’ అని ఎంఎంటీసీ పీఏఎంపీ చీఫ్ ఎగ్జిక్యూటివ్ మేనేజింగ్ డైరెక్టర్ వికాస్ సింగ్ తెలిపారు.

అయితే ప్రస్తుతం ఈ గోల్డ్ బైబ్యాక్ ప్లాన్ ఆఫర్ కేవలం దేశ రాజధానిలో మాత్రమే అందుబాటులో ఉంది. రానున్న రోజుల్లో ఇతర ప్రాంతాల్లోనూ అందుబాటులోకి వచ్చే అవకాశముంది. బంగారం విక్రయించే వారు లైవ్ సీసీటీవీ కెమెరాలతో వారి బంగారం విక్రయ ప్రక్రియను చూడొచ్చని, ఎలాంటి మోసాలు లేకుండా అంతర్జాతీయ ప్రమాణాలతో వెరిఫికేషన్ పూర్తి చేసి బంగారానికి మంచి రేటు అందిస్తున్నామని పేర్కొన్నారు.

కనీసం 10 గ్రాముల నుంచి బంగారాన్ని విక్రయించొచ్చు. దీనికి రూ1,000 ఫీజు తీసుకుంటారు. పాన్ కార్డు, ఆధార్ కార్డు, క్యాన్సల్డ్ చెక్ వంటివి అందిస్తే బంగారం డబ్బులను నేరుగా బ్యాంక్ అకౌంట్‌కు ట్రాన్స్‌ఫర్ చేస్తారు. బంగారం విక్రయ ప్రక్రియ 60 నిమిషాల్లో పూర్తవుతుంది. వెంటనే మీ డబ్బులు మీకు వస్తాయి.