కళ్ళ కింద నల్లటి వలయాలను తగ్గించే ఇంటి చిట్కాలు

ఒత్తిడి, నిద్రలేమి, హార్మోన్ల మార్పులు, జీవన శైలిలో మార్పులు.. ఇలా రకరకాల కారణాల వల్ల కళ్ల కింద నల్లటి వలయాలు ఏర్పడతాయి. ప్రారంభంలోనే వీటిని గుర్తించి తగ్గించే దిశగా చర్యలు తీసుకోవాలి. లేదంటే కళ్ల కింద నల్లటి మచ్చలు అలాగే ఉండిపోవడంతోపాటు అనేక ఆరోగ్య సమస్యలు కూడా తలెత్తుతాయి. సౌందర్య ఉత్పత్తులను వాడటం ద్వారా వాటిని తగ్గించుకోవచ్చు. కానీ వాటిలోని రసాయనాలు హానికరం. ఈ వలయాలను తగ్గించడానికి సహజ మార్గాలు అనేకం అందుబాటులో ఉన్నాయి. వాటిని పాటిస్తే రెండు రోజుల్లోనే డార్క్ సర్కిల్స్ మాయం అవుతాయి.

1. కళ్ల కింద ఏర్పడే నల్లటి వలయాల సమస్య నుంచి బయటపడటానికి టమాటోలు ఎంతగానో ఉపయోగడపతాయి. టమాటోలు చర్మంపై మచ్చలను తొలగించి, మెరిసేందుకు తోడ్పడతాయి. ఒక టీ స్పూన్ టమాటా జ్యూస్‌కు నిమ్మరసం కలిపి కళ్ల కింద రాసుకోవాలి. పది నిమిషాలు ఆగిన తర్వాత చల్లటి నీటితో కడిగేసుకోవాలి. రోజుకు రెండుసార్ల చొప్పున ఇలా చేయడం వల్ల ఫలితం ఉంటుంది.

2. గ్రీన్ టీ బ్యాగ్‌లను నీటిలో ముంచి కాసేపు రిఫ్రిజరేటర్‌లో ఉంచాలి. తర్వాత దాన్ని కళ్లపై ఉంచుకోవాలి. రెగ్యులర్‌గా ఇలా చేయడం వల్ల తప్పకుండా ఫలితం ఉంటుంది.

3. చల్లటి పాలలో దూదిని ముంచి కాసేపు ఉంచాలి. తర్వాత దాన్ని కళ్లు, నల్లటి వలయాలున్న ప్రాంతాన్ని కవర్ చేసేలా ఉంచాలి. కొద్ది సేపు అలా ఉంచాక నీటితో కడిగేసుకోవాలి. తరచుగా ఇలా చేయడం వల్ల చర్మంపై ఉన్న నల్లటి వలయాలు తగ్గుముఖం పడతాయి.

4. నారింజ జ్యూస్‌తోనూ నల్లటి మచ్చలను తొలగించొచ్చు. ఆరెంజ్ జ్యూస్‌లో కొద్దిగా గ్లిజరిన్ కలిపి నల్లటి వలయాలు ఉన్న చోట పూయాలి. ఇలా చేయడం వల్ల డార్క్ సర్కిల్స్ తగ్గడమే కాదు చక్కటి మెరుపు కూడా మీ సొంతం అవుతుంది.

5. కీరదోసను గుండ్రటి ముక్కలుగా తరిగి కళ్లపై ఉంచుకోవడం వల్ల నల్లటి వలయాలు తగ్గుముఖం పడతాయి. కీరదోస ముక్కలను అర గంటపాటు ఫ్రిజ్‌లో ఉంచి నల్లటి వలయాలు ఉన్నచోట ఉంచాలి. పది నిమిషాలు ఆగాక చల్లటి నీళ్లతో ముఖాన్ని కడిగేసుకోవాలి.

6. పుదీనా ఉత్తేజాన్ని రిఫ్రెష్‌నెస్‌ను ఇస్తుంది. కళ్ల కింద నల్లటి వలయాలను తొలగించడానికి కూడా దీన్ని ఉపయోగిస్తారు. పుదీనా ఆకులను నలిపి నీటిలో కలిపి పేస్టులా చేసుకోవాలి. దీన్ని డార్క్ సర్కిల్స్ ఉన్న చోట రాసి పది నిమిషాలపాటు వదిలేయాలి. వారంపాటు ప్రతి రాత్రి ఇలా చేయడం వల్ల అద్భుతమైన ఫలితాలు ఉంటాయి.

7. రోజ్ వాటర్ చర్మానికి పునరుత్తేజాన్ని ఇస్తుంది. దూదిని రోజ్ వాటర్‌లో ముంచి డార్క్ సర్కిల్స్‌పై ఉంచాలి. 15 నిమిషాలు ఆగాక చల్లటి నీటితో కడిగేసుకోవాలి. నెల రోజులపాటు ప్రతి రాత్రి ఇలా చేయడం వల్ల మెరుగైన ఫలితాలు ఉంటాయి.